Samarqanddagi kasb-hunarga o‘qitish markazi bitiruvchilariga diplom topshirish marosimi bo‘lib o‘tdi
|20:39 / 27.12.201719 1279 min
Foto: KUN.UZFoto: KUN.UZ
Samarqand shahridagi Koreya xalqaro hamkorlik agentligi — KOICA ko‘magi bilan barpo etilgan, Bandlik va mehnat munosabatlari vazirligi tasarrufidagi Kasb-hunarga o‘qitish markazida ikkinchi bitiruvchilarga diplom topshirish marosimi o‘tkazildi.
Tadbirda Koreya xalqaro hamkorlik agentligi — KOICAning O‘zbekistondagi idorasi direktori Song Seung-Il, Janubiy Koreyadan tashrif buyurgan ko‘ngilli o‘qituvchilar, Koreya ta'lim va texnologiya universiteti professorlari, Bandlik va mehnat munosabati vazirligining mas'ul xodimlari, markaz bilan hamkorlik qilayotgan korxona va tashkilotlardan tashrif buyurgan mehmonlar va markazni bitirayotgan talabalar qatnashdilar.
Qayd etib o‘tish joizki, kasb-hunarga o‘qitish markazida elektronika va asbobsozlik, payvandlash va chilangarlik, avtomobillarga texnik xizmat ko‘rsatish, axborot texnologiyalari yo‘nalishida har yili 240 talaba o‘qishga qabul qilib, 11 oy davomida bepul o‘qitiladi. Shuningdek, markaz qoshida koreys va ingliz tillarini o‘qituvchi pullik kurslar ham tashkil etilgan.
Markazda turli viloyatdan kelgan o‘quvchilar o‘qishmoqda. Xonalar va o‘quv ustaxonalari shinam va issiq. Talabalar qishning sovuq kunlarida ham darsda yengilgina kiyinib o‘tirishibdi. Markaz qoshida uzoq viloyat va tumanlardan kelgan talabalar uyi ham ochilgan. U yerda barcha sharoitlar hozirlangan. Hattoki jismoniy imkoniyati cheklangan talabalar uchun ham maxsus yotoq xonalari ajratilgan.
Tadbirga tashrif buyurgan mehmonlar o‘qitish markazi o‘quvchilarining bitiruv ishlari ko‘rgazmasi bilan tanishib chiqishdi.
Mehmonlarda katta taassurot qoldirgan ko‘rgazmadan so‘ng majlislar zalida bitiruvchilarga diplom topshirish marosimi bo‘lib o‘tdi. So‘zga chiqqan KOICAning O‘zbekistondagi ofisi direktori Song Seung-Il yig‘ilganlarni yangi yil va diplom bilan tabriklab, bu yerdagi o‘qitish jarayonidan chuqur qoniqish hosil qilganini aytdi va KOICA bunday markazlarni O‘zbekiston bo‘ylab ochishda davom etishi, xususan, yaqinda Shahrisabzda yana bir shunday markaz ishga tushishini ta'kidlab o‘tdi. Janob Song Samarqanddagi markazni KOICAning butun jahondagi markazlari ichida eng namunali markazga aylantirish uchun barcha imkoniyatlar va sharoitlar muhayyo ekanligini alohida qayd etdi.
Mavzuga oid
Bandlik va mehnat munosabatlari vazirligi viloyat boshqarmasi boshlig‘i Asliddin Usmonov, Koreya ta'lim va texnologiyalar universiteti professori janob Cho so‘zga chiqib, bitiruvchilarning kelgusi hayotlarida muvaffaqiyatlar tilashdi.
Markaz direktori, professor Ismoil Ergashev slaydlar vositasi markaz to‘g‘risida hisobot berdi. Markaz faoliyatini boshlaganidan buyon bugungacha erishilgan yutuqlar va kelgusidagi rejalarga qisqacha to‘xtalib o‘tdi.
Markazni shu yil iyun oyida ilk bor 211 nafar o‘quvchi bitirgan edi. Bugun hujjat topshirgan 576 kishidan imtihon asosida saralab olingan 240 talabaning 238 nafari davlat namunasidagi diplomlarga ega bo‘lib, turli korxonalarga yo‘l olishmoqda. Ularning ichida Samarqanddagi avtomobilsozlik korxonalari — MAN Auto Uzbekistan, SamAuto, shuningdek, viloyatdagi yana boshqa ishlab chiqarish korxonalari bor.
Tadbir so‘ngida bitiruvchi talabalar o‘zlari tayyorlagan madaniy dasturni taqdim etishdi.
Biz markaz direktori, texnika fanlari doktori, professor Ismoil Ergashevni suhbatga tortdik.
— Markazning rasmiy ochilish marosimi 2016 yil 16 oktabrda bo‘lib o‘tgan edi. O‘tgan bir yilda qanday ishlar amalga oshirildi? Markazning o‘rni nimalarda aks etdi?
— Avvalo, shuni ta'kidlash kerak-ki, markaz tashkilot va muassasalar buyurtmasiga asosan, tuman, shahar bandlikka ko‘maklashish markazlari tomonidan yo‘llanma asosida yuborilgan ishsiz yoshlarni zamonaviy kasblarga tayyorlash va qayta o‘qitishni amalga oshirish uchun tashkil qilingan. Bizga kelgunga qadar ishsiz bo‘lgan 211 nafar yoshlar fuqaro kasb egasi bo‘lganliklari to‘g‘risida diplomlar olishdi. Bugungi kunda barcha bitiruvchilarmiz turli korxonalarda o‘z ish o‘rinlariga ega bo‘lishdi. Ularning orasida o‘z biznesini yo‘lga qo‘yib, ish boshlaganlari ham bor. Ushbu yo‘nalishni yanada rivojlantirish maqsadida markazimizda «Biznes inkubator» tashkil etish bo‘yicha ishlar olib borilmoqda.
Bundan tashqari, bitiruvchilarimizdan besh nafari oliy o‘quv yurtlariga, shulardan ikki nafari Koreyaning nufuzli universitetlariga o‘qishga kirganligi markazni kelajakda yanada ravnaq topishida muhim ahamiyatga ega.
Bitiruvchilarning o‘z kasbi bo‘yicha ish o‘rinlariga ega bo‘lganligi, ularning malaka darajasi eng yirik, eng ilg‘or korxonalarni ham qoniqtira olayotganligi faoliyatimizning samarali tashkil etilganligini tasdiqlab turibdi.
— Xo‘sh, bu muvaffaqiyatning asoslari nimada?
— Birinchidan, O‘zbekiston Respublikasi Bandlik va mehnat munosabatlari vazirligi hamda Koreya xalqaro hamkorlik Agentligi (KOICA) tomonidan markazga bo‘lgan alohida e'tibor va doimiy nazoratning o‘rnatilganligidir.
Ikkinchidan, markaz moddiy-texnik bazasi bugungi kun talablariga to‘liq javob beradigan jihozlar bilan to‘liq ta'minlangan.
Shuningdek, talabalarga Koreya ta'lim va texnologiyalari universitetida malaka oshirib kelgan o‘zbekistonlik o‘qituvchilar hamda qoreyalik o‘qituvchilar hamjihatlikda dars berishmoqda.
O‘ziga xos o‘quv rejalari, darsliklar va barcha o‘quv materiallari amaliy o‘rgatishga yo‘naltirilgan, ya'ni nazariya ham amaliyot bilan uyg‘unlashtirilgan. Markazda «Learning – by doing», ya'ni «Bajarib o‘rganaman» uslubining qo‘llanilishidadir.
Markazimiz o‘tgan bir yil davomida 50 dan ortiq mahalliy va qo‘shma korxona bilan o‘zaro yaqin hamkorlik aloqalarini yo‘lga qo‘ydi. Hozirda talabalarning ishlab chiqarish amaliyoti ushbu korxonalarda o‘tkaziladi va eng yaxshi bitiruvchilar korxonalarda ishga olib qolinmoqda.
O‘zbekiston oliy o‘quv yurtlari hamda Koreyaning nufuzli Universitetlari bilan o‘qitish usullarini takomillashtirish, o‘qituvchilar malakasini oshirish, birgalikda loyihalar bajarish sohasida ham markaz o‘zaro hamkorlikni yo‘lga qo‘ydi.
Talabalarga kasb-hunar o‘rgatish bilan birgalikda, ularni shaxs sifatida rivojlantirish — o‘z biznesini yo‘lga qo‘yish, o‘z-o‘zini reklama qilish, muomala madaniyati, turli tadbirlar tashkil qilish va hokazolarga ham alohida e'tibor beriladi.
Markazimizda til o‘rgatish markazi tashkil etilgan bo‘lib, talabalar darsdan keyin ingliz, koreys, yapon, rus tillarini ham o‘rganish imkoniyatiga egalar. O‘tgan 1 yil davomida Markazdagi til markazini tugatgan talabalarning aksariyati imtihonlarini muvaffaqiyatli topshirib, Koreya hukumatining maxsus sertifikatlarga ega bo‘ldilar.
Bunday asoslarni yana ko‘plab keltirish mumkin. Ammo muvaffaqiyatlarga mahliyo bo‘lmasdan, erishilgan natijalarga tanqidiy nazar tashlagan holda kelajak rejalarini belgilash muhimdir.
— Ana shu kelgusidagi rejalar haqida gapirsangiz?
— Kelgusidagi asosiy faoliyat yo‘nalishlarimiz sifatida quyidagilarni belgilab olganmiz:
Markaz moddiy-texnik bazasini qo‘shimcha loyihalar amalga oshirish orqali yanada mustahkamlash; Koreya universitetlari bilan hamkorlikda yangi kasb bo‘yicha o‘qitish uchun o‘quv-metodik va moddiy-texnik bazani tashkil etish; avtomaktab tashkil etish orqali bitiruvchilarga qo‘shimcha kasb berish; sanoat korxonalari bilan uzviy aloqalarni rivojlantirish orqali «Family company», ya'ni «oilaviy korxonalar» sonini yanada oshirish; Viloyatimizning barcha tumanlarida o‘z amaliyot bazalarini tashkil etish va hokazolar.
Yuqoridagilarning barchasi yuqori malakali, keng dunyoqarashga ega bo‘lgan mutaxassislarni tayyorlashga qaratilgan. Markaz minglab, o‘n minglab talabalarga kasb-hunar o‘rgatib, o‘ziga ishonch uyg‘otish orqali ularni shaxs sifatida yanada kuchaytirishga xizmat qiladi. Xullas, zamonaviy kasb-hunar o‘rganaman, degan yoshlarimizga shunday xitob qilib qolaman: Markazimizga keling va bizning safimizga qo‘shiling!
Shuhrat Shokirjonov,
Kun.uz jurnalisti,
Samarqand.
