Нобель мукофоти совриндори, биолог Элизабет Блэкберн қаришни секинлаштиришнинг 5 та усулини маълум қилди. У Business Insider нашри билан суҳбатида ўз маслаҳатларини берди.

Мутахассис “хромосомалар тана ҳадлари ҳудудларининг қисқариши натижасида қариш назарияси” бўйича олиб борган илмий ишига асосланган ҳолда фикр юритган. 

Биринчидан, Блэкберн стресс билан курашишни тавсия этади. У тадқиқоти давомида аутизм ва бошқа сурункали касалликларга чалинган фарзандларини тарбиялаётган оналарни ўрганган. Бунда тушкунликка бардошли оналарда тана ҳадлари анча секин қисқарган. 

Иккинчидан олима медитация қилишни маслаҳат берган. Унинг таъкидлашича, икки ой мобайнида ҳар куни 12 дақиқа медитация қилганларнинг тана ҳадлари ўзгариши секинлашган. 

Фото: Reuters

Бундан ташқари, Блэкберн қўшнилар билан кўпроқ мулоқотда бўлиш, оила қуриб, бутун умрлик турмуш ўртоғи билан яшашни тавсия қилади. 

Шунингдек, биологнинг фикрича, пул ишлаб топиш ҳам кексайишни секинлаштиради. Унинг айтишича, тадқиқотлар юқори даромадли инсонларнинг тана ҳадлари одатда узун бўлишини кўрсатган. 

Элизабет Элен Блэкберн — америкалик цитогенетик олима ва физиология ва тиббиёт бўйича 2009 йилги Нобель мукофоти совриндори. У Кэрол Грейдер ва Жек Шостак билан бирга ушбу мукофотга муносиб кўрилган.