09:45 / 23.01.2018
22857

Qozog‘iston Belarusga javob qaytardi

Foto: Ca-news

Qozog‘iston Belarus tashqi ishlar vazirining tanqidiga javob qaytardi. U prezident Nursulton Nazarboyevning Ukraina bo‘yicha muzokaralarni Minskdan Ostonaga ko‘chirish borasidagi tashabbusi ustidan kulgandi.

Qozog‘iston tashqi ishlar vaziri o‘rinbosari Yerjan Ashikbayevning aytishicha, Qozog‘iston “Minsk maydonchasi muhimligini shubha ostiga qo‘ymaydi” va Ukrainadagi vaziyatga yechim topish bo‘yicha Minsk kelishuvlarini hurmat qiladi.

“Biz Minsk jarayoniga aralashayotganimiz yo‘q, - dedi Ashikbayev. – Biroq, Qozog‘iston to‘g‘ri yechimni topish ishlarini har doim qo‘llab-quvvatlashga tayyor”. Uning xabar berishicha, agarda mojaroning barcha tomonlari Qozog‘istonga murojaat etishga qaror qilishsa, Ostona buni “tegishli tarzda” ko‘rib chiqadi.

Eslatib o‘tamiz, Belarus tashqi ishlar vaziri Vladimir Makey Qozog‘iston yetakchisining avval Minskda o‘tkazilgan Ukraina bo‘yicha tinch muzokaralarni Ostonaga ko‘chirish haqidagi taklifi ustidan kulib, uni tanqid ostiga olgandi. Makeyning o‘z bayonotida aytishicha, muzokaralarni yangi joyga o‘tkazish hech narsani o‘zgartirmaydi.

Top