Birlashgan Arab Amirliklari Badiiy san'at muzeyi xodimlari Leonardo da Vinchi mo‘yqalamiga mansub «Dunyo xaloskori» kartinasini topa olishmayapti. Bu haqda xabar tarqatgan NYT maqolasiga ta'kidlanishicha, kartina Luvrning Abu-Dabi filialidan izsiz yo‘qolgan.
Mazkur kartina rejaga muvofiq 2018 yili ko‘rsatilmagan va bunga rasmiy izoh ham berilmagandi. Abu-Dabi Turizm va madaniyat boshqarmasi vakillari endilikda kartinaning yo‘qolib qolganiga ham munosabat bildirishga shoshilmayapti.
Gazeta maqolasida Luvrdagilar asarning haqiqiy joyini aniqlay olmagani bildirishgan.
«Dunyo xaloskori» asari 2017 yili Nyu-Yorkda o‘tkazilgan Christie's auksionida 450 million dollarga sotilgandi. Kartinani auksionga qo‘ygan sohib rossiyalik Dmitriy Rybolovlev bo‘lgani taxmin qilinadi. O‘z vaqtida Rybolovlev asarni shveysariyalik art-diler Iv Buvedan 127 million dollarga xarid qilgandi.
Luvrning Abu-Dabidagi filiali 2018 yil noyabrdan e'tiboran keng ommaga ochiq. U yerda 600dan ortiq badiiy san'at namunasi tomoshaga qo‘yilgan.
