O‘zbekistonda qonunchilikka muvofiq qator shaxslarga sanatoriy-kurort yo‘llanmalari bepul taqdim etiladi.
Ular quyidagi nogironlar va keksalar toifasi:
urush nogironlariga va qatnashchilariga tenglashtirilgan shaxslar;
halok bo‘lgan harbiy xizmatchilarning beva xotinlari (beva erlari);
respublika ahamiyatiga molik shaxsiy pensiya oluvchi shaxslar;
Chernobil halokati sababli nogiron bo‘lib qolgan shaxslar;
yadro poligonlarida harbiy xizmatni o‘tagan shaxslar;
I va II-guruh nogironlari, ko‘zi ojiz I-guruh nogironini kuzatib boruvchi shaxs;
yolg‘iz keksalar;
pensionerlar.
Yo‘llanma olish uchun quyidagi hujjatlar bandlikka ko‘maklashish markazlariga topshirilishi lozim:
ariza;
pasport nusxasi;
yuqoridagi fuqarolarning imtiyozdan foydalanish huquqini beruvchi hujjatlar (nogironlikni tasdiqlovchi, pensionerlar uchun guvohnoma va b.);
tibbiy xulosa.
Yo‘llanmalarni berish davriyligi quyidagicha:
har yili (navbat asosida):
urush nogironlariga tenglashtirilgan shaxslarga;
respublika ahamiyatiga molik shaxsiy pensiya oluvchi shaxslarga;
Chernobil AES halokati oqibatida nurlanish kasalligiga chalingan va uni boshidan kechirgan shaxslar, shuningdek Chernobil halokati sababli nogiron bo‘lib qolgan shaxslarga;
yadro poligonlari va boshqa radiatsiya-yadro obektlarida harbiy xizmatni o‘tagan shaxslarga;
yolg‘iz keksalarga;
ikki yilda bir marotaba (navbat asosida):
urush qatnashchilariga tenglashtirilgan shaxslarga;
halok bo‘lgan harbiy xizmatchilarning beva xotinlariga (beva erlariga);
I va II-guruh nogironlari, ko‘zi ojiz I-guruh nogironini kuzatib boruvchi shaxsga;
sanatoriylarda bo‘sh o‘rin mavjud bo‘lgan taqdirda, navbat asosida, ammo 3 yilda 1 marotaba — pensionerlarga.
Yo‘llanmalar o‘n ikki kunga, yo‘llanmalarning amal qilish muddati boshlanishidan kamida 10 kun oldin beriladi.
