Tashqi ishlar vazirligining taqdimnomasiga binoan O‘zbekiston prezidenti saylovini kuzatish uchun 401 nafar xalqaro kuzatuvchi akkreditatsiyadan o‘tkazilgani ma’lum qilingan.
O‘zbekistonda bo‘lib o‘tayotgan navbatdan tashqari prezident saylovini kuzatish uchun turli mamlakatlardan xalqaro kuzatuvchilar ishtirok etmoqda. Ular safida taniqli siyosatchilar ham bor.
Jumladan, “Yevropa Gruziyasi” partiyasi asosiy boshqaruv organi rahbari, YeXHT Parlament Assambleyasi sobiq prezidenti Georg Tsereteli Toshkent shahridagi saylov uchastkalarini borib ko‘rgan.
Georg Tsereteli kunning birinchi yarmida Yakkasaroy, Mirobod va Yunusobod tumanlaridagi 6 ta saylov uchastkasida bo‘lgan hamda u yerdagi saylov jarayonlarini kuzatgan. Shuningdek, u saylovga kelgan fuqarolar bilan suhbatlashgan.
Ma’lumot uchun, Georg Tsereteli Gruziya Parlamenti deputati, Parlament raisi o‘rinbosari, Gruziya bosh vaziri o‘rinbosari, YeXHT Parlament Assambleyasi prezidenti lavozimlarida ishlagan. Hozirda Gruziya Strategik tadqiqotlar markazi Siyosiy kengashi raisi sifatida faoliyat olib boradi.
