Ular 400 mln so‘m soxta pullarni 160 mln so‘m haqiqiy pulga sotayotganda tezkor xodimlar tomonidan qo‘lga olingan.
Qiziltepa tumanida qalbaki pul ishlab chiqarish bilan bog‘liq jinoyat fosh etildi. Bu haqda Kun.uz’ga Navoiy viloyati IIB axborot xizmati xabar berdi.
Ma’lum qilinishicha, 6 avgust kuni viloyat IIB TQX JQB hamda boshqa huquqni muhofaza qiluvchi organlar xodimlari hamkorligida tezkor tadbir o‘tkazilgan. Tadbir jarayonida tumanda yashovchi fuqaro A.R. shartli xaridorga jami 400 mln so‘m qalbaki pullarni 160 mln so‘mga sotishga kelishib, ushbu pulni olgan vaqtida ushlangan. A.R. olib borilgan tezkor suhbat davomida u 200 ming so‘mlik kupyuralarni Qiziltepa tumani Bo‘lakrabot mahallasi hududida joylashgan “Qiziltepa turon” MChJga qarashli savdo do‘konida tanishi A.X. bilan birgalikda bosib chiqarganini bildirgan.
Savdo do‘koni huquqni muhofaza qiluvchi organlar xodimlari tomonidan borib ko‘zdan kechirilganida u yerdan qalbaki kupyuralarni bosib chiqarishda foydalanilgan noutbuk, rangli printer hamda qalbaki pullar topilgan.
Hozirda holat yuzasidan tergovga qadar tekshiruv olib borilmoqda.
Oldinroq Buxoroda 100 ming so‘mlik qalbaki banknota ishlab chiqargan jinoiy guruh ushlangandi.
