AQSh Mudofaa vazirligi vakilining ma’lum qilishicha, AQSh harbiy obektlari uchuvchisiz uchoqlar va raketalar zarbasiga uchragan. U Eronga aloqador guruhlarni aybladi.
AQSh va IShID terrorchilik guruhiga qarshi kurashayotgan xalqaro koalitsiyaning Suriya va Iroqdagi harbiy bazalari so‘nggi bir hafta ichida 13 marta hujumga uchragan, dedi Pentagon matbuot kotibi general Pet Rayder 24 oktyabr, seshanba kuni. 17 oktyabrdan 24 oktyabrgacha bo‘lgan davrda askarlar Iroqda kamida 10 marta, Suriyada esa uch marta raketa va uchuvchisiz uchoqlar zarbasiga uchragan, deydi u.
Generalning so‘zlariga ko‘ra, hujumlar ortida «Islom inqilobi muhofizlari korpusi (IIMK) va Eron rejimidan ko‘mak olayotgan guruhlar» turibdi. Iroqdagi guruh hujumlarning bir qismi uchun javobgarlikni o‘z zimmasiga oldi va tegishli xabarlarni Telegram messenjerida e’lon qildi.
AQShning Yaqin Sharqdagi harbiy mavjudligi
AQSh IShIDga qarshi kurash uchun Suriyada 900 ga yaqin va Iroqda 2500 ga yaqin askarini joylashtirgan. AQSh Falastinning HAMAS tashkiloti tomonidan hujumga uchragan Isroilni qo‘llab-quvvatlashga va’da berganidan so‘ng Eronga yaqin qurolli guruhlar AQSh harbiy obektlariga hujum bilan tahdid qildi.
22 oktyabr kuni Qo‘shma Shtatlar mintaqadagi ishtiroki kuchayganini e’lon qildi hamda Eron va uning ittifoqdosh qurolli guruhlarini Yaqin Sharqdagi mojaroni keskinlashtirmaslik to‘g‘risida ogohlantirdi.
Isroil va HAMAS mojarosi
7 oktyabr kuni HAMAS jangchilari G‘azo sektoridan Isroilga qarshi keng ko‘lamli hujum uyushtirdi, natijada Isroil tomoni ma’lumotlariga ko‘ra, 1400 dan ortiq odam halok bo‘ldi, yana 220 dan ortiq kishi garovga olindi va G‘azo sektoriga olib ketildi.
Isroil bunga javoban G‘azo sektoriga yirik havo hujumlari uyushtirdi, mintaqani nazorat qilayotgan HAMASga ko‘ra, 5700 dan ortiq odam, jumladan 2340 nafar bola va o‘smir halok bo‘ldi.
