YeMB uchta asosiy foiz stavkasini yana pasaytirdi

Yevropa Markaziy banki (YeMB) 12 dekabr, payshanba kuni bo‘lib o‘tgan boshqaruv kengashi yig‘ilishida yevrohududdagi barcha uchta asosiy foiz stavkalarini 0,25 foiz punktga pasaytirdi. Yig‘ilish yakunlari bo‘yicha e’lon qilingan xabarda aytilishicha, 18 dekabrdan boshlab depozit stavkasi 3 foiz, asosiy qayta moliyalash operatsiyalari stavkasi 3,15 foiz, marjali kreditlar bo‘yicha stavka esa 3,4 foiz bo‘ladi.

Bu YeMB yevrozonada inflatsiyaning sekinlashuvi fonida pul-kredit siyosatini bosqichma-bosqich yumshatish siklini boshlagan iyun oyidan beri stavkalarni to‘rtinchi marta pasaytirishdir.

YeMB inflatsiyani 2 foizga tushirmoqchi

Bank boshqaruvi yevrohududda inflatsiyani 2 foiz darajasida barqarorlashtirishni rejalashtirmoqda. 2024 yil oxiriga borib u 2,4 foizni tashkil qilishi kutilmoqda. Shu bilan birga, noyabr oyida bazaviy inflatsiya 2,3 foizni tashkil etdi.

Shu bilan birga, Germaniyada oktyabr oyida inflatsiya yillik hisobda 2 foizni tashkil etdi. Avgust oyida bu ko‘rsatkich 1,9 foizga, sentabrda esa 1,6 foizga teng bo‘lgan. Germaniyada inflatsiya o‘sishining asosiy omillari oziq-ovqat va xizmatlar narxining oshishi bo‘ldi.

YeMB iyundan beri stavkalarni pasaytirmoqda

Iyun oyi boshida Yevropa Markaziy banki yevrohududdagi asosiy stavkani 2019 yildan beri birinchi marta yillik 4,5 foizdan 4,25 foizgacha pasaytirdi. O‘shanda bu yumshatish Rossiyaning Ukrainaga qarshi urushi natijasida yuzaga kelgan energiya inqirozi boshlanganidan beri pul-kredit siyosatidagi birinchi qadam edi.

Sentyabr va oktyabr oylarida yana ikkita pasayish kuzatildi.