Internetda Trampning o‘limi haqida feyk xabarlar tarqaldi

Ijtimoiy tarmoqlarda AQSh prezidenti Donald Trampning o‘limi haqidagi xabarlar shiddat bilan tarqaldi. #TrumpIsDead heshtegi X (Twitter) platformasida o‘n minglab postlar bilan birinchi o‘ringa chiqdi.

Oq uy rahbarining o‘limi haqida hech qanday rasmiy xabar yo‘q. Gap, ehtimol, AQSh prezidentining sog‘lig‘i haqidagi mish-mishlar va vitse-prezident Jyeyms Vensning so‘nggi bayonotlari natijasida yuzaga kelgan virusli trend haqida ketayotgan bo‘lishi mumkin.

Vens USA Today nashriga bergan intervyusidagi gapi muhokamalarga sabab bo‘ldi. Unga agar fojia yuz bergan taqdirda prezidentlik lavozimini egallashga tayyormisiz, degan savol berildi. Siyosatchi Trampning «sog‘lig‘i joyida» deb javob berdi, ammo «ha, fojialar sodir bo‘ladi va men bunga tayyorman», deb ta’kidladi.

Vitse-prezidentning so‘zlari prezidentning sog‘lig‘i yomonligiga ishora sifatida qabul qilindi.

«Ishonchim komil, prezident ajoyib formada va muddatini yakunlaydi. Ammo agar Xudo ko‘rsatmasin, fojia yuz bersa, men o‘zimdagi 200 kunlik tajribadan yaxshiroq tayyorgarlikni o‘ylab topa olmayman», dedi Vens.

Mish-mishlar Trampning qo‘llari ko‘karib, oyoqlari shishib ketgani aks etgan suratlar tufayli kuchaydi. Iyul oyida Oq uy Trampda keksalarda shish keltirib chiqaradigan surunkali venoz yetishmovchiligi tashxisini tasdiqladi. Ammo kasallik hayotga tahdid solmayotgani, prezident tetikligicha qolayotgani va ishini davom ettirayotgani ta’kidlandi.

«Prezident Tramp boshqa har qanday yetakchiga qaraganda ko‘proq odamlarni kutib oladi va ko‘proq qo‘l siqib, ko‘rishadi. Uning ishga bo‘lgan sadoqati shubha uyg‘otmaydi», dedi Oq uy matbuot kotibi Kerolayn Levitt.

Virusli trendni «Simpsonlar» multfilmi muallifi Mett Greyning so‘zlari qo‘llab-quvvatladi. U Comic-Con dasturida shou «ba’zilar o‘lmaguncha» davom etishi haqida hazillashdi va qo‘shimcha qildi: «Kim o‘lganini bilganingizdan keyin ko‘chalarda odamlar raqsga tushadi. Lekin prezident Vens bu raqslarni taqiqlaydi».

Serialning «kelajak bashoratchisi» sifatidagi obro‘sini hisobga olgan holda, ijtimoiy tarmoqlar buni darhol ilib ketdi. Bundan tashqari, tarmoqda «Oq uy yaqinidagi tez yordam mashinalari» va Trampning o‘limi haqidagi soxta «Simpson bashoratlari» aks etgan videolar tarqaldi. Bularning barchasi feyk va mem bo‘lib chiqdi.

Shu bilan birga, Trampning o‘zi ikki kun ketma-ket ko‘rinmay, omma e’tiboridan vaqtincha g‘oyib bo‘ldi, bu esa mish-mishlarni yanada kuchaytirdi. Keyinchalik u Truth Social nashrida sudning tariflar bo‘yicha qarorini sharhladi va mish-mishlarni bilvosita rad etdi.

Hozircha Donald Trampning o‘limi haqida hech qanday rasmiy ma’lumot yo‘q. Barcha xabarlar mish-mishlar va internet memlariga borib taqaladi. Oq uy va prezidentning o‘zi bunday mish-mishlarni bir necha bor rad etgan. Tez orada Tramp yana ommaga ko‘rinish berishi va qandaydir bayonot bilan chiqishi kutilmoqda.