Оқ уй: Трампда сурункали веноз етишмовчилиги бор

17 июл, пайшанба куни Оқ уй матбуот котиби Кэролайн Ливитт шифокор хулосасига таянган ҳолда хабар беришича, АҚШ президенти Доналд Трампга сурункали веноз етишмовчилиги ташхиси қўйилди, бу касаллик оёқларда қон айланишининг бузилиши билан боғлиқ. Унинг баёноти бир қатор оммавий ахборот воситаларида Трампнинг тўпиқлари шишиб кетгани ва қўлида кўкариш борлиги ҳақида хабар берилганидан кейин эълон қилинди.

Ливиттнинг сўзларига кўра, таҳлиллар ва ултратовуш текширувлари 79 ёшли сиёсатчида «чуқур томирлар тромбози ёки артериал касаллик белгилари»ни аниқламаган. Шунингдек, у юрак етишмовчилиги ёки буйрак функциясининг бузилиши аломатларини кўрсатмади, дея қўшимча қилди матбуот котиби. Унинг аниқлик киритишича, кўкаришлар тез-тез қўл бериб кўришиш ва юрак-қон томир касалликларини олдини олиш бўйича стандарт дастурнинг бир қисми бўлган аспирин қабул қилиш билан боғлиқ бўлиши мумкин.

Апрел ойида Доналд Трамп Оқ уйга қайтганидан сўнг касалхонада биринчи йиллик тиббий кўрикдан ўтди, деб эслайди dpa агентлиги. Ўшанда у когнитив тестдан муваффақиятли ўтганини эълон қилган эди.

«Умуман олганда, мен жуда яхши формада эканлигимни ҳис қилдим. Яхши юрак. Яхши қалб. Жуда яхши қалб», — деди Трамп.