26 noyabr kuni Toshkent shahrida yurtimizda ilk marotaba o‘tkazilayotgan akademik cholg‘ular, estrada va an'anaviy ijrochilik bo‘yicha “Iste'dod” xalqaro tanlovi boshlandi. Bu haqda Xalq ta'limi vazirligi Axborot xizmati xabar qildi.
Xalq ta'limi vazirligi tomonidan tashkil etilgan mazkur nufuzli xalqaro tanlovda 10 dan ortiq davlatdan (Fransiya, Koreya Respublikasi, Azerbayjan, Turkiya, Rossiya Federatsiyasi, Belorussiya, Qozog‘iston, Qirg‘iziston, Tojikiston) va yurtimizdan 160 nafardan ortiq iqtidorli yosh ijrochilar ishtirok etishmoqda.
“Iste'dod” xalqaro tanlovi 2 ta bosqichda fortepiano, torli cholg‘ular (skripka, alt, violonchel, kontrabas), estrada xonandaligi va an'anaviy xonandalik yo‘nalishlarida bo‘lib o‘tmoqda.
Xalqaro tanlov dasturiga ko‘ra 26-27 noyabr kunlari 1-2 bosqichlar bo‘lib o‘tadi. Tanlov ishtirokchilari uchun 28 noyabr kuni qadimiy va navqiron Samarqand shahriga sayohat uyushtirilib, shahardagi tarixiy obidalar hamda O‘zbekiston Respublikasi Prezidentining 2008 yil 8 iyuldagi “Bolalar musiqa va san'at maktablarining moddiy-texnik bazasini mustahkamlash va ularning faoliyatini yanada yaxshilash bo‘yicha 2009-2014 yillarga mo‘ljallangan Davlat dasturi to‘g‘risida”gi Qarori asosida mamlakatimiz bolalar musiqa va san'at maktablarida olib borilgan islohotlar bilan yaqindan tanishadilar. Xususan, Samarqand shahridagi 1-sonli bolalar musiqa va san'at maktabi faoliyati va u yerda yosh iqtidor egalari uchun yaratilgan zamonaviy shart-sharoitlar, ta'lim-tarbiya jarayonlarining guvohi bo‘lishadi.