Kam ta’minlanganlarga QQS summasi qaytarib beriladigan tovarlar ro‘yxati kengaytirildi

Prezident qarori bilan ayrim normativ huquqiy hujjatlarga o‘zgartirish va qo‘shimchalar kiritildi.Xususan, “Ijtimoiy himoya yagona reyestri”ga kiritilgan jismoniy shaxslar tomonidan sotib olinganda QQS summasi qaytarib beriladigan ayrim turdagi oziq-ovqat mahsulotlari ro‘yxatiga quyidagilar kiritildi:

• un;
• shakar;
• dori vositalari va tibbiy xizmatlar.

Bunda qo‘shilgan qiymat solig‘i summasini qaytarish oyiga BHMning 10 baravarigacha bo‘lgan xaridlar summasi doirasida amalga oshirilishi belgilandi.

Ma’lumot uchun, 2023 yil 1 maydan “Ijtimoiy himoya yagona reyestri”ga kiritilgan jismoniy shaxslar chakana savdo obektlaridan ayrim tovarlarni sotib olganda xarid summasidan 1 foiz miqdordagi keshbek o‘rniga 12 foiz QQS qaytarilib kelinmoqda.

Shu paytgacha QQS qaytarib beriladigan mahsulotlar ro‘yxatida quyidagi mahsulotlar bo‘lgan:

• qo‘y go‘shti;
• parranda go‘shti;
• mol go‘shti;
• tuxum;
• o‘simlik yog‘i.

Keshbek qaytarish tartibi qanday?

QQSni qaytarib olish uchun “Ijtimoiy himoya yagona reyestri”dagi iste’molchi “Soliq” mobil ilovasini yuklab olib, Face-ID orqali ro‘yxatdan o‘tishi hamda ilovada xarid chekining QR-kodini skanerlashi lozim.

QQS qaytarilishi uchun quyidagi shartlar bajarilishi kerak:

• xaridor “Ijtimoiy himoya yagona reyestri”da bo‘lishi;
• sotib olingan mahsulot QQS qaytariladigan mahsulotlar ro‘yxatiga kirishi;
• tadbirkorning QQS to‘lovchi sifatida ro‘yxatdan o‘tgani.

Reyestrdagi iste’molchi:

• QQS qaytariladigan mahsulotlar bilan birga boshqa turdagi mahsulotlarni xarid qilib, chekni ro‘yxatdan o‘tkazganda, QQS qaytariladigan mahsulotlar uchun 12 foiz, boshqa turdagi mahsulotlar uchun 1 foiz keshbekka ega bo‘ladi;
• QQS to‘lovchisi bo‘lmagan tadbirkorlik sub’yektidan QQS qaytariladigan mahsulotlar sotib olganda, hozirgidek 1 foiz keshbek qaytariladi.

QQS summasi chek ro‘yxatdan o‘tkazilgan oydan keyin oyning 25-sanasidan so‘ng “Soliq” mobil ilovasi orqali to‘lab beriladi.