So‘nggi yillarda O‘zbekistonda ko‘p qavatli uylar qurilishi keskin ko‘paydi. Ammo afsuski, noqonuniy qurilish qilayotgan tadbirkorlar va yangi ko‘p kvartirali uy quraman, deb fuqarolar ishonchiga kirib, aldov yo‘li bilan ularning pulini olishni maqsad qilganlar ham tez-tez uchramoqda.
Qurilishi hali bitmagan yoki umuman boshlanmagan uylardan kvartira sotib olishda nimalarga e'tibor berish kerak? Biz shu masala yuzasidan Qurilish vazirligida bo‘ldik. Savollarimizga Qurilish vazirligi boshqarma boshlig‘i Sherzod Sodiqov va vazirlik bo‘lim boshlig‘i Elyor Komilov javob berdi.
— Yangi uylarni sotib olishda ko‘p tushunmovchiliklar bor. Qurilishda «ulush kiritish asosida» degan tushuncha paydo bo‘ldi, buni sherikchilik deb atasa bo‘ladi. Shu munosabat bilan 2020 yil 7 may kuni prezident qarori qabul qilindi. Unga asosan, ulush kiritish, ya'ni aholining pulini jalb qilgan holda uy qurmoqchi bo‘lsa, elektron ro‘yxatga kirishi kerak.
Elektron ro‘yxatga kirishda 5ta talab bor. Birinchisi, qurilish tashkilotining ko‘p kvartirali uylarni qurish uchun yer uchastkasiga egalik huquqi va qurilish ishlarini amalga oshirishga birlamchi ruxsat beruvchi hujjatlar mavjudligi;
Ikkinchisi, qurilish majmuasiga kiradigan ko‘p kvartirali uylar va boshqa qurilish obektlari qiymatining 20 foizidan kam bo‘lmagan miqdorda o‘z mablag‘i yoki kredit ajratish haqida bank kafolat xati mavjudligi. Bu talab quruvchi tashkilotning avvaldan qurilish boshlashga puli bo‘lishini kafolatlaydi.
Uchinchisi, qurilish majmuasining loyiha-smeta hujjatlari va ijobiy ekspertiza xulosasi bo‘lishi kerak.
To‘rtinchisi, texnik va mualliflik nazorati hamda davlat nazoratini amalga oshirish uchun tegishli shartnomalar bo‘lishi kerak. Qurilishning har bir jarayonida sifatga alohida e'tibor berish maqsadida ushbu talab qo‘yilgan.
Beshinchisi, tijorat bankida tadbirkorning aynan mana shu uy uchun ochilgan maxsus hisobraqami bo‘lishi kerak. Ushbu talab aholidan yig‘ilayotgan pulning haqiqatdan ham qurilish maqsadida ishlatilishini hamda pulning ishonchli saqlanishini ta'minlaydi.
