Respublika ta’lim markazi rahbari yangi darslikka tadbirkor Murod Nazarov haqida ma’lumot qo‘shilganiga izoh berdi

Markaz rahbariga ko‘ra, zamonaviy ta’lim metodlari bo‘yicha darsliklarga shu zamonning turli sohalarida mehnat qilayotgan taniqli shaxslar kiritilishi ta’lim ta’sirchanligini oshirishda muhim hisoblanadi.

“Bu – yangi metod. Siz ta’lim tizimi rivojlangan dunyo davlatlaridagi darsliklarni ko‘rsangiz, ayni shu uslubdan foydalanilayotganini ko‘rasiz.

Biz ham ta’limni hozirgi zamon bilan bog‘lash va ta’sirchanligini oshirish uchun darsliklarimizga bugungi islohotlarda faol olimlar, sportchilar, san’atkorlar, hunarmandlar, tadbirkor yoki boshqa soha vakillarini kiritib boryapmiz.  Bu yoshlarga shu soha vakillarini namuna qilib ko‘rsatish, o‘quvchilarga kelgusidagi maqsadlarini aniqlab olish, kasb tanlash va motivatsiya uchun ham muhim.

Masalan, darslikda xayriya ishlariga ko‘p mablag‘ ajratadigan yoki kasal bolalarga yordam beradigan mashhur kishi namuna qilinsa, bu orqali o‘quvchilarga yaxshilik mavzusi ochib berilishi mumkin. Biz shu maqsadda tarbiya darsligida taniqli tadbirkor Alisher Usmonov faoliyati haqida ham ma’lumot kiritganmiz.

Yoki Shayx Muhammad Sodiq Muhammad Yusuf hazratlarining qalamiga mansub «Ibratli hayot yo‘llari», «Umrini ilmga bag‘ishlagan zot» «Kitobga oshnolikning mukofoti» kabi mavzularda jamlangan ma’lumotlar shu kitobda aks ettirildi.

Bu darslikni ko‘rganlar unda turli sohada mehnat qilayotgan yana o‘nlab taniqli shaxslarni ham ko‘rishi mumkin. Masalan, grafik dizayner Jamshid Xoliqulov, tadbirkor Akmal Fayziyev, futbol hakami Ravshan Ermatov, olima Aziza Shonazarova, tadbirkor Botir Orifjonov, navoiyshunos olima Suyuma G‘aniva, o‘quv markazi asoschisi Jahongir Po‘latov, iqtisodchi Raufxon Salaxo‘jayev, ichki ishlar xodimi, xizmat vaqtida jon bergan marhum Azizxon Tursunov, fermer Lola Murodova, shaxmatchilar Javohir Sindorov,  Nodirbek Abdusattorov yoki Braziliya va Tokioda o‘tgan olimpiada o‘yinlari g‘oliblari. Xo‘sh, buning nimasi yomon? Ular bugungi yoshlarga namuna ekani aniq-ku. Qachongacha yoshlarga namuna qilib ko‘rsatishda faqat bir necha o‘n asr avval yashagan ota bobolarimizni ko‘rsatamiz? Bugungi zamonamiz qahramonlari haqida qachon gapiramiz?

Muammo shundaki, bu yangi metod va uni hamma ham oson qabul qilolmayapti”, – dedi markaz rahbari.

Uning qo‘shimcha qilishicha, yangi darsliklar bugun ko‘plab o‘qituvchi va o‘quvchilarga ma’qul kelmoqda. “Bu orqali yangi metodimiz o‘zini oqladi, deyish mumkin”, – dedi Shuhrat Sattorov.