Bugun poytaxtimizdagi «Milliy» stadionda O‘zbekiston Respublikasi Jismoniy tarbiya va sport vazirligi, Milliy olimpiya qo‘mitasi, Espors Uzbekistan, Full Level Espors hamda UZREPORT va FUTBOL TV telekanallari bilan hamkorlikda tashkil etilgan «Yangi yilga sport bilan!» shiori ostidagi ommaviy sport festivali boshlandi.
Festivalda 7 yoshdan 70 yoshgacha bo‘lgan yurtdoshlarimiz sportning mini-futbol, stritbol, basketbol, velosport, yugurish, dars, arqon tortish, badminton, armrestling, tosh ko‘tarish, stol tennisi hamda «Workout» (ko‘cha fitnesi) yo‘nalishlari, shuningdek, yilning eng yirik turnirlari – shaxmat bo‘yicha onlayn O‘zbekiston chempionati hamda Kibersport bo‘yicha Grand final musobaqalarida o‘z imkoniyatlarini sinab ko‘rishmoqda.
Festivalning ochilish marosimi o‘ziga xos shou tarzida tashkil etildi. San'at va sport yulduzlari esa o‘z chiqishlari bilan yig‘ilganlarni xushnud etdi.
Darvoqe, «Yangi yilga sport bilan!» shiori ostidagi ommaviy sport festivalining ilk kunida ishtirok etolmagan poytaxtimiz aholisi va mehmonlari 29 va 30 dekabr kunlari kelib, bemalol festivalda ishtirok etishlari mumkin.
Shunday ekan, imkoniyatni qo‘ldan chiqarmang va sovg‘alarni qo‘lga kiriting!
Jismoniy tarbiya va sport vazirligi Matbuot xizmati
