O‘zbekiston ijtimoiy va ishlab chiqarish infratuzilmasini rivojlantirish vazifalari belgilandi

Hujjatga ko‘ra, «O‘zbekiston-2030» strategiyasida belgilangan vazifalarni hayotga tatbiq etish maqsadida Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari, manfaatdor vazirliklar, idoralar hamda xo‘jalik birlashmalari tomonidan jamoatchilik fikri va aholi istaklari asosida 2024-2026 yillarda O‘zbekistonning ijtimoiy va ishlab chiqarish infratuzilmasini rivojlantirish dasturi ishlab chiqildi.

Qaror bilan 2024 yilda ijtimoiy va ishlab chiqarish infratuzilmasini rivojlantirishning asosiy parametrlari hamda 2025-2026 yillar uchun maqsadli mo‘ljallar: 

- 2024 yilda ijtimoiy va ishlab chiqarish infratuzilmasini rivojlantirish doirasida moliyalashtiriladigan yo‘nalishlarning asosiy parametrlari;
- 2024 yilda ijtimoiy va ishlab chiqarish infratuzilmasi obektlarida yangi quvvatlar yaratishning maqsadli ko‘rsatkichlari hamda 2025-2026 yillar uchun maqsadli mo‘ljallar;
- 2024 yilda loyihaoldi va loyiha hujjatlari ishlab chiqiladigan budjet tizimi budjetlaridan moliyalashtiriladigan obektlar ro‘yxati va boshqalar tasdiqlandi.

Shuningdek, qarorga ko‘ra, Qoraqalpog‘iston Respublikasi Vazirlar Kengashi raisi, viloyatlar va Toshkent shahar hokimlari, vazirliklar, idoralar va xo‘jalik birlashmalari rahbarlari dasturning asosiy parametrlari, maqsadli ko‘rsatkichlari va manzilli ro‘yxatlarini belgilangan muddatlarda sifatli va to‘liq amalga oshirish, shuningdek, ajratilgan mablag‘larni maqsadli hamda samarali sarflanishini ta’minlash uchun javobgar hisoblanadi.