Jamoatchilik muhokamasidan o‘tgan Davlat dasturida 5ta asosiy yo‘nalish belgilandi

22 yanvar kuni O‘zbekiston prezidenti farmoni bilan «Faol tadbirkorlik, innovatsion g‘oyalar va texnologiyalarni qo‘llab-quvvatlash yili»da amalga oshiriladigan davlat dasturi tasdiqlandi.

Davlat dasturi loyihasi keng jamoatchilik muhokamasidan so‘ng qabul qilindi.

Dastur muhokamasi chog‘ida fuqarolardan 4 ming 400ta taklif va sharhlar qoldirildi.

Dasturning eng ko‘p muhokama qilingan qismi Davlat va jamiyat qurilishini takomillashtirish bo‘ldi (1,5 mingta yoki jami taklif va sharhlarning 34 foiz). 

Fuqarolardan kelib tushgan takliflar asosida Dasturga 5ta band kiritildi, 11ta band qayta ishlandi.

Adliya vazirligi matbuot xizmati keltirishicha, dasturda davlat va jamiyat hayotining boshqa muhim masalalar bilan bir qatorda  quyidagi 5ta asosiy yo‘nalish belgilangan: 

– davlat xizmati nufuzi va samaradorligini oshirish, ijro hokimiyati vazifalari va tuzilmasini qayta ko‘rib chiqish, vazirlik, idoralar va hokimlarning mustaqilligini oshirish, davlat xizmatlari sifati va tezkorligini tubdan ko‘tarish;

– qonun ustuvorligini ta'minlash va sud-huquq tizimini yanada isloh qilish sohasida tintuv va telefon so‘zlashuvlarini eshitishga sanksiya berish huquqini sudlarga o‘tkazish, Oliy Majlis huzurida sud hokimiyati mustaqilligini ta'minlash komissiyasini tuzish, milliy xavfsizlik organlari tizimini tubdan isloh qilish, vaqtincha hibsda saqlash joylari va tergov izolyatorlari, jazoni ijro etish muassasalarini videokuzatuv tizimi bilan jihozlash, yo‘l-patrul va patrul-post xizmatini mobil videokameralar bilan jihozlash, statsionar post va patrul xizmatini optimallashtirish;

– faol tadbirkorlikni rivojlantirish, innovatsion g‘oya va texnologiya lar joriy etish uchun qulay huquqiy va tashkiliy sharoit yaratish, soliq va bojxona, bank-moliya sohalarida tadbirkorlik sub'yektlari faoliyatiga noqonuniy aralashishni oldini olishga qaratilgan himoya mexanizmlarining huquqiy kafolatini takomillashtirish, agrar sohani isloh qilish strategiyasini ishlab chiqish, yakka turdagi imtiyozlardan tarmoqlar va sohaviy imtiyozlar berish orqali voz kechish, hududlarni jadal rivojlantirish;

– fuqarolarning ijtimoiy himoya qilish va sog‘liqni saqlashni yanada kuchaytirish bo‘yicha kompleks tadbirlarni amalga oshirish, ijtimoiy dorixonalarning keng tarmog‘ini yaratish, aholi daromadlari va bandligini oshirish, «iste'molchi savatchasi»ni aniqlashtirish, ijtimoiy turarjoylar qurishni kengaytirish, aholining ijtimoiy zaif qatlamlari va nogironligi bo‘lgan shaxslarning har tomonlama manzilli qo‘llab quvvatlash;

– Milliy xavfsizlikning yangi konsepsiyasini qabul qilish, xorijlik hamkorlar bilan harbiy  va harbiy texnik hamkorlikni yanada mustahkamlash va rivojlantirish, davlat chegaralarini himoyalash va qo‘riqlash, terrorizm, ekstremizm va informatsion tahdidlarga qarshi kurashish tizimini takomillashtirish, millatlararo va konfessiyalararo totuvlik, diniy bag‘rikenglikni mustahkamlash, Tashqi ishlar vazirligi va diplomatik vakolatxonalar faoliyatini tubdan isloh qilish, xorijda fuqarolar huquqlari va manfaatlarini himoya qilish tizimi samaradorligini oshirish, o‘zaro manfaatli tashqi aloqalarni davom ettirish, savdo-iqtisodiy va madaniy-gumanitar aloqalarni rivojlantirish.

Shuningdek, Farmon bilan tadbirkorlik sub'yektlarining moliyaviy-xo‘jalik faoliyatini tekshirishga 2 yillik moratoriy (to‘xtatish) e'lon qilindi.

Dastur doirasida 179ta qonun hujjatlari qabul qilinishi rejalashtirilgan.