Baliqchilik sohasi rivojlantiriladi - ToshDAUda baliqchilik yo‘nalishi bo‘yicha sirtqi bo‘lim ochiladi

O‘zbekiston Respublikasi Prezidentining «2018 yilda baliq mahsulotlari yetishtirish hajmini oshirish bo‘yicha qo‘shimcha chora-tadbirlar to‘g‘risida»gi PQ-3505 sonli qarori imzolandi.

So‘ngi yillarda O‘zbekistonning ichki bozorini sifatli va arzon baliq mahsulotlari bilan to‘ldirish, mahsulotning talabgir turlariga narxlarni bir maromda ushlab turish bo‘yicha qator ishlar amalga oshirilib kelmoqda. Jumladan, mamlakat miyoqsida 3 mingdan ziyod baliqchilik xo‘jaligi faoliyat ko‘rsatmoqda.

Endi Prezident qaroriga ko‘ra, mavjud imkoniyatlardan samarali foydalanish, xorijiy davlatlarning ijobiy tajribasi va innovatsion texnologiyalardan foydalangan holda baliq yetishtirish hajmini oshirish uchun choralar ko‘rilmoqda.

Jumladan, baliqchilikni ilmiy asosda tashkillashtirish, O‘zbekistonda baliq yetishtirish hajmini innovatsion texnologiyalarni keng jalb etish yo‘li bilan oshirish, baliqchilik sohasida ozuqa bazasini kengaytirish, baliqni ovlab tutishni tashkillashtirish, baliqchilik xo‘jaliklarining moddiy-texnika bazasini mustahkamlash uchun ularni aylanma mablag‘lar bilan ta'minlash singari sohani rivojlantirish uchun ustuvor vazifalar belgilab olinmoqda.

Respublika bo‘yicha 2018 yilda sun'iy suv havzalarida 103,4 mln, tabiiy havzalar va suv omborlarida 29,8 mln, to‘rhalqa qurilmalarida 15,3 mln, sun'iy qurilmalarda 17,2 mln, yopiq siklli suv ta'minotiga ega qurilmalarda 4,8 mln va sholizorlarda 35,1  mln — jami 205,6 mln dona baliq ko‘paytiriladi.

2018 yilda baliq yetishtirishning prognoz parametrlariga ko‘ra respublikada 150 ming tonna baliq yetishtirish mo‘ljallanmoqda. Bundan sun'iy suv havzalarida 74.785 t, tabiiy havzalar va suv omborlarida 33.815 t, to‘rhalqa qurilmalarida 13.290 t, sun'iy qurilmalarda 7.900 t, yopiq siklli suv ta'minotiga ega qurilmalarda 4.800 t va sholizorlarda 15.410 t yetishtirish nazarda tutilgan.

Eng ko‘p baliq Toshkent viloyatida — 20.125 t, Qoraqalpog‘iston Respublikasida — 20.000 t, Aydar-Arnasoy ko‘llar tizimida — 18.845 t, Sirdaryo viloyatida — 13.645 t  va Navoiy viloyatida — 10 ming tonna yetishtiriladi.

Respublika bo‘yicha 2018 yilda baliqchilik xo‘jaliklariga 186.266 t omixta yem, 26.100 t mineral o‘g‘itlar yetkazib berish nazarda tutilmoqda.

Qarorga ko‘ra, baliqchilik sanoatini rivojlantirish uchun Xitoy, Vetnam, Indoneziya va boshqa davlatlardan tajribali xorijiy mutaxassislar jalb qilinadi.

2018/2019 o‘quv yilidan boshlab Toshkent davlat agrar universiteti va uning Nukus filialida baliqchilik ta'lim yo‘nalishi bo‘yicha sirtqi bo‘lim ham ochiladi.