Tasavvur qiling: ko‘chada keta turib, taqiqlangan hududda axlat uyumiga duch keldingiz, u yerdan kelayotgan badbo‘y hid esa kayfiyatga ta'sir qildi. Shunday paytda nima qilardingiz? Albatta, bunga befarq qarab bo‘lmaydi. Mutasaddi tashkilotga qo‘ng‘iroq qilib, (katta ehtimol bilan bu Obodonlashtirish boshqarmasi) vaziyat haqida ma'lumot berasiz. Tabiiyki, xodimlarning yetib kelishi va muammoni bartaraf etishga ma'lum muddat sarflanishi mumkin. Yo‘lovchining tig‘iz paytda jarayonni kuzatishga vaqti bo‘lmaydi, hisob.
Taklif etilayotgan ProActive innovatsion dasturi orqali barchasini nazorat qilish imkoniyati mavjud. Loyiha asoschilari - Toshkent shahridagi Inxa universiteti talabalari A.Siyayev, Sh. Sodiqov, Yu. Xo‘jayeva, Z. Usmonovlarning fikricha, bu dastur fuqarolarning ijtimoiy ogohligini oshiradi.
Bu haqda batafsil ma'lumotlarni mualliflardan biri Yulduz Xo‘jayeva so‘zlab berdi.
- ProActive dasturini ishlab chiqish g‘oyasi qay tariqa vujudga keldi?
- Yaqinda Janubiy Koreyaning Inxa universitetida talabalar almashinuvi dasturi bo‘yicha tahsil olib, O‘zbekistonga qaytdik.
- Startap ishlash mexanizmiga to‘xtalib o‘tsangiz.
- Tartibi juda oddiy: ko‘chada turli muammolar yuzaga kelishi, oqibatda bu aholi sog‘lig‘i, xavfsizligiga tahdid solishi mumkin. Masalan, ko‘chada gaz quvuri portlashi, kichik yo‘l transport hodisalari yoki belgilanmagan joylardagi chiqindilar. Bunday paytda darhol tegishli organga xabar qilish zarurati paydo bo‘ladi. O‘sha paytda mobil telefoningizdagi ProActive ilovasiga kirib, holatni suratga tushirasiz. Xaritadan voqea sodir bo‘lgan manzilni topib, uni kiritasiz.
- Innovatsion g‘oyani ishlab chiqish uchun qancha vaqt sarflandi?
- 4 oy muddat talab etildi. Guruhda har kim o‘ziga yuklatilgan vazifani astoydil bajardi. Shuning uchun, birgalikda kelishib ishlash, nisbatan taqsimlangan ishlarni osonlashtirdi, deya olaman. Guruhdoshim Aziz ilovani Android versiyasini ishlab chiqqan bo‘lsa, qolganlar loyiha uchun qo‘shimcha dasturlarni yaratishdi.
- Koreya va AQShda IT sohasi bo‘yicha ta'lim olgansiz. Xorijdagi tengdoshlaringizdan nimalarni o‘rgandingiz?
- Xorijda talabalarning mustaqil fikrlashiga ko‘proq e'tibor berishadi. Jahon tajribasida mustaqil ta'limga keng o‘rin ajratilgan. Bunda talaba turli innovatsion loyihalarni amalga oshiradi. Qo‘shimcha manbalardan izlanadi. Ularda men qadrlaydigan jihat – tashabbuskorlikni ko‘rdim. Biror ishni boshlagandan keyin unga sidqidildan yondashishadi. Talabalar xalqaro tanlovlarga muntazam qatnashishadi va o‘zaro fikr almashishadi.
