O‘zbekiston Respublikasi Prezidenti Shavkat Mirziyoyev ushbu lavozimga saylangach, o‘zining dastlabki xorijiy tashrifini Turkmaniston Respublikasiga amalga oshirgan edi.
O‘tgan qisqa davr ichida Mirziyoyev uch marta Turkmanistonda mehmon bo‘ldi, xususan, Turkmanobodda Amudaryo uzra Turkmaniston va O‘zbekistonni bog‘lovchi zamonaviy avtomobil va temiryo‘l ko‘priklarining ochilish marosimida ishtirok etdi.
Bu Mirziyoyev prezident etib saylangach, Gurbanguli Berdimuhamedovning O‘zbekistonga ilk davlat tashrifi. Ikki qo‘shni davlatning siyosiy, madaniy va iqtisodiy hamkorlik qilish bo‘yicha hal qilinishi kerak bo‘lgan masalalari juda ko‘p edi.
Ikki davlatning tobora yaxshilanib, yangi bosqichga ko‘tarilib borayotgan munosabatlari mamlakatlar ravnaqiga xizmat qilishi shubhasiz. Shu bois, bunday tashriflar nafaqat rasmiy doiralarda, balkim aholida, jumladan, yoshlarda ham katta qiziqish uyg‘otmoqda. Gurbanguli Berdimuhamedovni Toshkent ko‘chalarida har ikki davlat bayrog‘ini hilpiratib turgan minglab yoshlar qizg‘in kutib olishdi.
Berdimuhammedovning O‘zbekistonga tashrifi asnosida Qo‘shma bayonot imzolandi. Shuningdek, hududlararo hamkorlikni rivojlantirish, savdo uylari ochish, ishbilarmonlar kengashi tashkil etish bo‘yicha, yana transport, tranzit, qishloq xo‘jaligi, fan-texnika, kasaba uyushmalari, sport va boshqa sohalarga doir 17ta hujjat imzolangan.
«2017 yil O‘zbekiston va Turkmaniston munosabatlarida tarixiy yil bo‘ldi. Hozirgi kunda hamma kelishuvlarimiz to‘liq amalga oshirilmoqda. Bugungi uchrashuvimiz ham juda samarali bo‘ldi. Mamlakatlarimiz o‘rtasidagi hamkorlikni chuqur, har tomonlama muhokama qildik. Shuni alohida ta'kidlamoqchimanki, bu borada hal etilmagan masalalar qolmadi. Barcha yo‘nalishlar bo‘yicha o‘zaro anglashuvga erishdik. Shu asosda mamlakatlarimiz o‘rtasidagi hamkorlikni yanada rivojlantirish istiqbollarini belgilab oldik. Biz nimaiki qilayotgan bo‘lsak, xalqlarimiz uchun, bolalarimizning kelajagi uchun», — dedi Shavkat Mirziyoyev muzokaralardan so‘ng ommaviy axborot vositalari xodimlari oldida chiqish qilar ekan.
Shavkat Mirziyoyev Turkmaniston rahbari bilan muzokaralardan keyin OAV vakillari bilan uchrashuv chog‘ida O‘zbekiston Turkmaniston-Afg‘oniston-Pokiston-Hindiston (TAPI) transmilliy gaz quvuri loyihasida ishtirok etishini tasdiqlab, bu loyiha Afg‘onistondagi vaziyatni barqarorlashtirish omili ekani haqida ma'lum qildi:
«O‘zbekiston TAPI loyihasida ishtirok etadi. Biz bu loyihada turkman do‘stlarimiz bilan birgalikda tutashuv nuqtasini topamiz. Bu rostdan ham umumiy loyiha. TAPI —Afg‘onistonda amalga oshirishni xohlagan tinchlik va barqarorlikni ta'minlaydigan jiddiy loyiha», — dedi O‘zbekiston rahbari.
