Hitlerning o‘limi borasidagi bahslarga nuqta qo‘yildi

Adolf Hitler o‘limi borasida son-sanoqsiz taxminlarga, u o‘lmagani va Antarktidaga to‘rtinchi reyxni barpo etish uchun ketgani haqidagi farazlarga nuqta qo‘yildi. Hitler aniq Berlinda 1945 yilda, sianid zahari va o‘qdan o‘lgan. Bu haqda diktatorning Moskvada saqlangan tish bo‘lagiga tayanib fransiyalik tadqiqotchilar ma'lum qilishdi. 

“Bu tishlar Hitlerniki, bunga shubha yo‘q. Tadqiqotlarimiz Hitlerning 1945 yilda o‘lganini isbotlaydi”, deb aytgan professor Filipp Sharle. “Biz Hitler haqidagi barcha fitnalarga chek qo‘ya olamiz. U Argentinaga suv osti kemasida qochmagan, Antarktidadagi yashirin bazada yoki Oyning qorong‘i tomonida yashirinmagan”, deydi olim.

Tadqiqot natijalari European Journal of Internal Medicine jurnalida chop etilgan.

Hitlerning yomon tishlari va ko‘plab protezlari tahlili ularda oq qatlam (toshlar) borligini va hech qanday go‘sht qoldiqlari yo‘qligini ko‘rsatgan. Diktator vegetarian bo‘lgan, deb aytmoqda olim. 2017 yil mart va iyulida Rossiya Federal xavfsizlik xizmati va davlat arxivi olimlarga Hitler suyaklarini tadqiq qilishga ruxsat bergan. Frantsuzlar fyurerning boshi suyagini tadqiq qilishga muvaffaq bo‘lishgan. Bosh suyagida chap tomondan ehtimol o‘q o‘tishidan qolgan teshik topilgan.

Umuman olganda, tadqiqot Hitler 1945 yil 30 aprelda Berlindagi bunkerida rafiqasi Yeva Braun bilan o‘lgani haqidagi umumqabul qilingan taxminni tasdiqladi. Biroq olimlar endi fyurer aynan nimadan o‘lgani borasida boshlari qotgan: o‘qmi yoki sianidli ampulami? Unisi ham, bunisi ham bo‘lishi mumkin. Bundan tashqari, Hitler bosh suyagi og‘iz qismida porox izlari topilmagan va demak, to‘pponcha og‘izga emas, bo‘yin yoki peshonaga qaratilgan bo‘lishi mumkin.

Olimlarning fikricha, tish protezlaridagi ko‘kimtir qatlam sianid va protezlardagi metallning kimyoviy reaksiyaga kirishganidan darak berishi mumkin.