Samarqandda haydovchilar 10 milliard so‘mga yaqin jarima to‘lashdi. Nega?

Joriy yilning o‘tgan davri mobaynida Samarqand viloyatida 232 mingga yaqin yo‘l harakati qoidalarini buzish holati qayd etilgan. Shundan 95 ming 900tasi qo‘pol, 6 ming 261tasi mast holda transport vositasini boshqarish, 10 mingga yaqini piyodalar bilan bog‘liq qoidabuzarliklardir.

«Kun.uz» muxbiri Samarqand viloyati IIB Yo‘l harakati xavfsizligi boshqarmasi mas'ul xodimi Nuriddin HAYITOV bilan shu xususida suhbatlashdi.

– Viloyatda yo‘l harakati xavfsizligini ta'minlash, yo‘l-transport hodisalarining oldini olish maqsadida kompleks chora-tadbirlar dasturi ishlab chiqilgan va amaliyotga joriy etilgan, – deydi N. Hayitov. – Mazkur dastur ijrosi yuzasidan viloyatdagi idora va tashkilotlar, jamoatchilik vakillari bilan kelishilgan holda zarur choralar belgilangan.

Xususan, viloyat hududidagi avtomobil yo‘llari yoqasida 74 joyda yo‘l harakat ishtirokchilarini hushyorlikka, ogohlikka chaqiruvchi bannerlar, plakatlar o‘rnatildi. Shuningdek, yirik savdo majmualari, yoqilg‘i quyish shoxobchalari kirish joylarida kichik hajmli va Samarqand shahri ko‘chalaridagi 12ta katta hajmli ekranlarga yo‘l harakati qoidalarini targ‘ib qiluvchi videoroliklar joylashtirildi.

Viloyat avtomobil yo‘llarida yo‘l belgilari ham ko‘zdan kechirilib, qo‘shimcha 1713ta yo‘l belgilari o‘rnatildi va 739 metr uzunlikdagi 1-guruh muhofazalovchi to‘siqlar qo‘yildi.

– Yo‘l harakati hodisasiga aksariyat hollarda haydovchilar tomonidan tezlikni oshirish sabab bo‘lmoqda…

– To‘g‘ri. Bunday holatlarning oldini olishga qaratilgan choralar ham ko‘rilmoqda. Jumladan, viloyat hududidan o‘tuvchi xalqaro va davlat ahamiyatidagi avtomobil yo‘llariga 71ta tezlikni o‘lchash uskunalari va 27ta yo‘l-patrul xizmat avtomashinasi mulyaji o‘rnatildi.

Bundan tashqari, onlayn tizimda ishlovchi 4ta «Arena» rusumli tezlikni o‘lchash uskunasi hududlarga joylashtirildi. Ushbu zamonaviy uskunalar yordamida 2 oy davomida 26 mingga yaqin qoidabuzarlik aniqlandi. Qoidabuzarlardan jami 10milliard so‘mga yaqin jarima undirildi.

– Vazirlar Mahkamasining 2018 yil 19 maydagi qarori bilan haftaning har juma kuni «Yo‘l harakati xavfsizligi kuni» etib belgilandi. Viloyatda qarorning ijrosi qanday ta'minlanyapti?

– Haftaning juma kunlari asosiy e'tibor profilaktik tadbirlar va aholi o‘rtasida yo‘l harakati xavfsizligi targ‘ibotiga qaratilmoqda. Shuningdek, qo‘pol qoidabuzarliklar, xususan, mast holda avtotransport vositasini boshqargan va inson o‘limiga olib kelgan yo‘l-transport hodisasini sodir etgan shaxslar ishi yuzasidan mahallalarda hududiy sudlar bilan hamkorlikda sayyor sud majlislari o‘tkazilmoqda.

– Ushbu chora-tadbirlarning samarasi qanday bo‘lmoqda?

– Albatta, bu choralar o‘z natijasini bermoqda. Jumladan, yo‘l-transport hodisalari o‘tgan yilga nisbatan 7,5 foiz, halok bo‘lganlar soni 9,6 foiz, tan jarohati olganlar soni 10,7 foiz, bolalar ishtirokidagi yo‘l-transport hodisalari esa 27,8 foizga kamaydi.

– Yo‘l harakati xavfsizligini ta'minlashda jamoatchilik imkoniyatlaridan qanday foydalanilyapti?

– Avtomobil yo‘llarida jamoatchilik nazoratini kuchaytirish maqsadida Telegram messenjerida boshqarmaning o‘z kanali, Facebook ijtimoiy tarmog‘ida sahifalari ochilgan. Ushbu internet tarmoqlari orqali fuqarolardan kelib tushgan ma'lumotlar asosida joriy yilda 417ta qoidabuzarlik aniqlanib, tegishli choralar ko‘rilgan.

Bardoshbek SAMAD o‘g‘li suhbatlashdi