Vazirlar Mahkamasining “Noyob ilmiy obektlarni aniqlash, ularni saqlash va monitoringini olib borish bilan bog‘liq faoliyatni tartibga solish chora-tadbirlari to‘g‘risida”gi qarori qabul qilindi.
Hujjat bilan Noyob ilmiy obektlarni aniqlash, ularni saqlash va monitoringini olib borish tartibi to‘g‘risida nizom tasdiqlandi.
Nizomga ko‘ra, ilmiy faoliyat uchun alohida ahamiyatga ega bo‘lgan, tadqiqot ishlarining saviyasini jahon andozalari darajasiga ko‘tarishda muhim ahamiyatga ega hamda mazkur Nizomda belgilangan tartibda noyob ilmiy obektlar ro‘yxatiga kiritilgan ilmiy muassasalar, ilmiy faoliyatga mo‘ljallangan noyob asbob-uskunalar, kolleksiyalar, nodir jamg‘armalar va boshqa ilm-fan uchun noyob hisoblanadigan obektlar noyob ilmiy obekt deb hisoblanadi.
Obektlarni noyob ilmiy obektlar ro‘yxatiga kiritish (ro‘yxatdan chiqarish) hamda ularni moliyalashtirish bo‘yicha takliflarni o‘z tasarrufida oliy ta'lim va ilmiy muassasalari bo‘lgan vazirliklar va idoralar O‘zbekiston Respublikasi Innovatsion rivojlanish vazirligiga taqdim etadilar.
O‘zbekiston Respublikasi Innovatsion rivojlanish vazirligi Fanlar akademiyasi, vazirliklar va idoralar hamda muassasalarning obektlarni noyob ilmiy obektlar ro‘yxatiga kiritish bo‘yicha takliflarini o‘rganib chiqadi, umumlashtiradi, noyob ilmiy obektlar ro‘yxatiga kiritadi (ro‘yxatdan chiqaradi), ro‘yxatni tasdiqlaydi, noyob ilmiy obektlarni saqlash va ulardan samarali foydalanish bo‘yicha ishlarni muvofiqlashtiradi hamda doimiy monitoringini olib boradi.
Noyob ilmiy obekt deb hisoblashda obektlar quyidagi mezonlar asosida baholanadi:
obektning respublikada yagona (noyob) bo‘lishi;
obektning ilmiy-amaliy ahamiyatga ega bo‘lishi va ilmiy tadqiqotlarda foydalanilayotgan bo‘lishi;
tegishli sohada ushbu obeksiz fundamental yoki amaliy tadqiqot olib borishning imkonsizligi;
obektning moddiy jihatdan yuqori qiymatga ega bo‘lishi.
Vazirliklar va idoralar o‘z tasarrufidagi oliy ta'lim va ilmiy muassasalardan noyob ilmiy obektlar ro‘yxatini shakllantirish uchun takliflarni har yili 25 martga kadar qabul qiladi. Bunda, tavsiya qilinayotgan har bir ilmiy obektning fan va texnika taraqqiyoti hamda ilmiy-tadqiqot faoliyati rivojlanishi uchun ahamiyatliligi darajasi vazirliklar va idoralarning tegishli hay'at majlislarida muhokama qilinadi va O‘zbekiston Respublikasi Innovatsion rivojlanish vazirligiga kiritish uchun obektlar ro‘yxati shakllantiriladi.
