Amerikalik talabalar O‘zbekistonga keldi

AQShdagi Amerika universitetining bir guruh talabalari “Alternative break” dasturi bo‘yicha O‘zbekistonga keldi. 

Delegatsiya a'zolari tashrif davomida O‘zbekiston yoshlar ittifoqi Markaziy Kengashida ko‘ngilli yoshlar markazi faoliyati bilan yaqindan tanishib, o‘zbekistonlik ko‘ngilli yoshlar va oliy ta'lim muassasalari talabalari bilan o‘zaro ochiq muloqot qildi.

- “Muqobil ta'tillar” dasturi doirasida o‘zbek xalqining tarixi, urf-odati va milliy taomlari, yurtimizning diqqatga sazovor joylariga sayohat, shuningdek, O‘zbekiston yoshlari bilan ta'lim sohasida o‘zaro fikr almashish maqsadida tashrif buyurgan xorijlik talabalar ko‘ngillilar faoliyatini keng targ‘ib qilishga qaratilgan loyihalari bilan o‘rtoqlashmoqda, – deydi O‘zbekiston yoshlar ittifoqi Markaziy Kengashi bo‘lim mudiri Munisa Nurmatova. 

Xorijlik talabalar AQShdagi ko‘ngilli jamoalar tajribasi va amaliyoti haqida o‘zbekistonlik ko‘ngilli yoshlar bilan tajriba almashdi. Amerika universitetining “Muqobil ta'tillar” dasturi doirasida O‘zbekiston yoshlar ittifoqi bilan hamkorlikda “Yoshlarning diplomatiya va xalqaro munosabatlardagi o‘rni” mavzuiga bag‘ishlangan konferensiya o‘tkazilishi rejalashtirildi.  

- “Muqobil ta'tillar” dasturi 1993 yilda AQSh universitetlari tizimiga kiritilgan bo‘lib, dastur Amerika va dunyoning boshqa mintaqalaridagi yoshlar bilan tanishuv, ma'lumot almashinuvi maqsadida oliy ta'lim muassasalari bilan faoliyat olib bormoqda, – deydi Amanda Martinez. - Amerika universitetining oldingi dasturlari Janubiy Afrika Respublikasi, Gaiti, Isroil, Keniya, Moldaviya, Hindiston va boshqa mamlakatlarida amalga oshirilgan. Bu yilgi o‘quv yilida Tanzaniya, Vetnam, O‘zbekiston, Kuba, Gaiti, Shimoliy Irlandiya, shuningdek, Texas va Yangi Orlean shtatlariga sayohatlar uyushtirilyapti. Dastur xarajatlari Amerika universitetining ko‘magi bilan talabalar tomonidan qoplanadi.

Delegatsiya suhbatda o‘z faoliyati bo‘yicha ma'lumot berib,  AQShdagi ixtiyoriy amaliyot xususida so‘z yuritdi. Ko‘ngillilarning jamiyat ravnaqiga qo‘shayotgan hissasi, ushbu maqomning afzallik jihatlari bilan bog‘liq fikr-mulohazalar yuritildi. 

O‘zbekistonda ko‘ngillilik madaniyatini rivojlantirish imkoniyatlari va uni targ‘ib qilishning qo‘shimcha usullari o‘zaro muhokama qilindi.    

- Men turkiy xalqlar milliy urf-odatlari va an'analariga juda qiziqaman. Ko‘ngilli sifatida yillar davomida Turkiya, Xitoy kabi bir qator davlatlarda faoliyat olib bordim. Bu vaqt ichida chet tillarini o‘rgandim, – deydi amerikalik talaba Peter Ter. - Faoliyatim davomida moddiy manfaatdan ko‘ra tajriba oshirishga ko‘proq e'tibor qaratdim. Bugun esa birin-ketin maqsadlarimga erishyapman.

Shahnoza Nurullayeva,
O‘zbekiston yoshlar ittifoqi matbuot xizmati