Un va non ishlab chiqarishga zamonaviy energiya tejamkor texnologiyalar joriy qilinadi 

Un va non mahsulotlarini ishlab chiqarishga zamonaviy energiya tejamkor texnologiyalarni joriy qilish hamda iste'molchilarga sifatli mahsulotlarni yetkazib berish chora-tadbirlari qabul qilinadi.

Vazirlar Mahkamasi qarori loyihasiga ko‘ra, Qishloq xo‘jaligi vazirligi, Innovatsion rivojlanish vazirligi, Fanlar Akademiyasi, “O‘zdonmahsulot” aksiyadorlik kompaniyasi, Qishloq xo‘jaligi vazirligi huzuridagi Qishloq xo‘jalik va oziq-ovqat ta'minoti ilmiy ishlab chiqarish markazi, Don va dukkakli don ekinlari ilmiy tadqiqot instituti “2020-2022 yillarda g‘alla yetishtirish va g‘alla navlari seleksiyasini rivojlantirish dasturi”ni ishlab chiqadi.

Bunda, sug‘oriladigan va lalmi yerlarda g‘alla yetishtirish, zamonaviy agrotexnologiyalarni qo‘llash, agrotexnik tadbirlarga rioya qilish orqali don hosildorligini oshirish, “urug‘lik – don – un – non va non mahsulotlari” to‘liq zanjiri bo‘yicha ilmiy izlanishlarni muvofiqlashtirish, non va non mahsulotlari ishlab chiqarishga mo‘ljallangan yuqori sifatli g‘alla navlarini seleksiya qilish va rayonlashtirishga alohida e'tibor qaratiladi.

Iqtisodiyot va sanoat vazirligi, Davlat aktivlarini boshqarish agentligi va “O‘zdonmahsulot” aksiyadorlik kompaniyasining “O‘zdonmahsulot” aksiyadorlik kompaniyasi tizimida tashkil etilgan non va makaron mahsulotlari ishlab chiqarish korxonalaridagi don korxonalari aktivlari va ulushlarini investorlarga sotish yuzasidan taklifiga rozilik beriladi.

Davlat aktivlarini boshqarish agentligi bilan birgalikda “O‘zdonmahsulot” aksiyadorlik kompaniyasi tizimidagi aksiyadorlik jamiyatlarining boshqaruv organlari qarorlari asosida non mahsulotlari ishlab chiqarish korxonalaridagi don korxonalari aktivlarni va ulushlarini investorlarga sotish ishlarini tashkil qiladi.

Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari “O‘zsanoatqurilishbank” ATB bilan birgalikda 2020-2021 yillarda energiya tejamkor texnologiyalar asosida savdo maydoni mavjud non va non mahsulotlari ishlab chiqarish kichik korxonalarini tashkil qilish bo‘yicha investitsiya loyihalarini amalga oshirishni ta'minlaydi. 

Bunda:

non va non mahsulotlari ishlab chiqaruvchi kichik korxonalarni tashkil etishda savdo maydonlari bo‘lishi sharti bilan yer maydonlari ajratish va zarur muhandislik-kommunikatsiya, yo‘l va transport infratuzilmalariga ulanishni ta'minlaydi;

korxonalarni aholi ko‘p istiqomat qiladigan hududlarda joylashtirish, aholining kunlik ehtiyojini to‘liq qondirishga qaratilgan ish vaqti asosida, korxonaning o‘zida yoki unga yaqin manzilda non va non mahsulotlari chakana savdosini tashkil etishga alohida e'tibor qaratiladi;

yangi tashkil etiladigan non korxonalarida maktabgacha ta'lim muassasalari, maktablar, qandli diabet bilan og‘rigan bemorlar uchun kletchatkaga boy ixtisoslashgan non mahsulotlari turlarini ishlab chiqarishni yo‘lga qo‘yadi;

kredit summasi hamda kredit foizidan qat'i nazar qolipli non va non mahsulotlari ishlab chiqarishni tashkil etish hamda kengaytirish maqsadida aylanma mablag‘larni to‘ldirishga, asosiy vositalarni sotib olish hamda bino-inshootlarning qurilish-montaj ishlari va rekonstruksiyasi uchun tijorat banklari tomonidan ajratiladigan milliy valutadagi kreditlar bo‘yicha foiz xarajatlari 10 foizlik punktdan oshmagan miqdorda, shuningdek, xorijiy valutadagi kreditlar bo‘yicha foiz xarajatlari tijorat banklari tomonidan belgilangan stavkaning 50 foizi miqdorida, biroq 5 foizlik punktdan oshmagan miqdorda Tadbirkorlik faoliyatini qo‘llab-quvvatlash davlat jamg‘armasi mablag‘lari hisobidan qoplanishi tartibi tatbiq qilinadi.

2019 yil noyabr va dekabr oylarida mazkur qaror doirasida amalga oshirilayotgan loyihalar uchun ajratilgan kreditlar bo‘yicha tijorat banklari tomonidan taqdim etilgan tasdiqlovchi hujjatlar asosida Tadbirkorlarni qo‘llab-quvvatlash jamg‘armasi tomonidan kompensatsiya to‘lovlari ajratilishiga ruxsat beriladi.

Qurilish vazirligi, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari bilan birgalikda non va non mahsulotlari ishlab chiqarish binolarini qurish yoki rekonstruksiya qilish ishlari bo‘yicha loyiha-smeta hujjatlarini zamonaviy arxitektura talablari asosida ishlab chiqishda hamda ekspertizadan o‘tkazishda amaliy yordam ko‘rsatadi.

Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari quyidagilarni amalga oshirishni ta'minlaydi:

transport qatnovi murakkab bo‘lgan tog‘li va tuman markazidan olis aholi punktlari uchun aholi talabiga mos ravishda un, non va non mahsulotlari muntazam yetkazib berish tizimini tashkil etishni, bunda, zarur hollarda tadbirkorlik sub'yektlariga mahalliy budjet mablag‘lari hisobidan qisqa, uch oygacha muddatga foizsiz ssuda mablag‘lari ajratish hisobiga amalga oshirish choralarini ko‘rish;

non ishlab chiqarish korxonalarini xatlovdan o‘tkazgan holda, ularni texnologik jarayonni tashkil etish va yuritish qoidalariga amal qilgan holda faoliyat yuritishini;

dehqon bozorlari va aholi gavjum bo‘lgan hududlarda keng assortimentdagi non va non mahsulotlarini sotish uchun non va non mahsulotlari ishlab chiqaruvchi korxonalarga ixtisoslashgan (maxsus) savdo firma do‘konlarini tashkil etish bo‘yicha manzilli dasturlarni ishlab chiqish, tasdiqlash hamda ularni amalda joriy etilishini.

Iqtisodiyot va sanoat vazirligi 2020 yil 1 mayga qadar ichki iste'mol bozoridagi bug‘doy uniga bo‘lgan talab va takliflardan kelib chiqib, davlat resurslari hisobidan birja savdolariga qo‘yiladigan un hajmini muvozanatini ta'minlash orqali kunlik monitoringini amalga oshirib borishi ma'lumot uchun qabul qilinadi.
 
Monopoliyaga qarshi kurashish qo‘mitasi, “Respublika tovar xomashyo birjasi” AJ bilan birgalikda don va un mahsulotlarini, shu jumladan fermer xo‘jaliklari ixtiyorida qolgan hamda importdan keltirilgan don va un mahsulotlarini sotish bo‘yicha elektron birja savdolari tizimida alohida savdo platformasini joriy qiladi.

Monopoliyaga qarshi kurashish qo‘mitasi huzuridagi Iste'molchilar huquqlarini himoya qilish agentligi chakana savdo va xizmat ko‘rsatish shoxobchalarida un, non va non mahsulotlarini nazorat xaridini amalga oshirilishini hamda ularni belgilangan standart talablariga va texnik reglamentlarga muvofiqligi yuzasidan ekspertizadan o‘tkazilishini tashkil etadi.

Bunda, Iste'molchilar huquqlarini himoya qilish agentligi tomonidan taqdim etilgan mahsulotlar namunalari sifatining ekspertizasi “O‘zstandart” agentligi tizimidagi va boshqa akkreditatsiyadan o‘tgan sinov laboratoriyalarida amalga oshiriladi hamda tovarlarni muvofiqligini baholash bilan bog‘liq xarajatlar “O‘zstandart” agentligi huzuridagi standartlashtirish, metrologiya va sertifikatlashtirishni rivojlantirish maxsus jamg‘armasi mablag‘lari hisobiga moliyalashtiriladi.