19:41 / 11.04.2020
6117
Соғлиқни сақлаш вазирлиги мутахассислари «Coronavirusyordam» боти орқали аҳоли мурожаатларига жавоб бермоқда

Март ойи охирида Соғлиқни сақлаш вазирлиги томонидан ташкил этилган «Coronavirusyordam» онлайн телеграм бот канали қисқа вақт ичида 83 мингдан ортиқ фуқаронинг мурожаатини қабул қилди.

Фото: Соғлиқни сақлаш вазирлиги

«Соғлиқни сақлаш вазирлиги UZINFOCOM ягона интегратори билан ҳамкорликда «coronavirusyordam» Telegram-ботини ишга туширган эди. Унинг мақсади бугунги эпидемиологик вазиятда аҳоли ўртасида тарғибот ишларини самарали ва тўғри ташкил қилиш, фуқароларнинг коронавирус инфекцияси билан боғлиқ барча саволларига тўлақонли ҳамда ишончли жавоб беришдан иборат.

Ботда аҳоли томонидан кўп берилаётган саволлар тўплами ва уларга малакали мутахассислар томонидан тайёрланган жавоблар қулай шаклда жойлаштирилган. Бундан ташқари, фуқаролар операторларга саволлар йўллаб, улардан ёзишма орқали жавоблар олишмоқда. Бот-маслаҳатчи ўзбек ва рус тилларида юритилмоқда. Онлайн маслаҳатчи модулининг 70га яқин тажрибали шифокор, профессор ва ўқитувчилардан иборат операторлар гуруҳи уч сменада тун-у кун онлайн тартибида аҳоли томонидан келиб тушаётган барча саволларга жавоб беришмоқда», дейилади Соғлиқни сақлаш вазирлиги Жамоатчилик билан алоқалар бўлими хабарида.

Маълум қилинишича, жорий йилнинг 31 март куни ишга тушган телеграм ботга бугун, 11 апрель соат 15:00гача 83 мингдан ортиқ фуқаро кирган. Улардан 10 мингдан ортиғи операторлар билан чат орқали боғланган ва 18 мингдан ортиқ саволларга жавоб олишган. Қолганлар эса ботдаги тайёр савол-жавоблардан ўзларига керакли маълумотларни олишган.

«Операторларнинг барчаси иш бошлашдан аввал улар учун ташкил қилинган семинарда махсус тайёргарликдан ўтишган. Бугунги кунда энг кўп бериладиган саволлар қуйидагича: вилоятлар ёки туманлар кесимида касалланганлик ҳолати қандай, коронавирус инфекциясига учраган инсонда касалликнинг белгилари қанақа бўлади, COVID-19 тасдиқланган ҳолатлар карантиндагилар ичидан аниқланаяптими ёки аҳоли орасидан, беморларнинг ҳозирги аҳволи қанақа ва ҳоказолар.

Шунингдек, ижтимоий соҳага оид саволлар ҳам кам эмас. Операторларимиз уларнинг барчасига асосланган жавобларни беришмоқда, керак бўлганда, тегишлилиги бўйича саволга жавоб бериш учун масъул хизматларнинг телефон рақамларини келтиришмоқда.

Фуқаролар ҳаммасидан ҳам кўпроқ карантин качон тугайди, деган саволни беришлари табиий. Унга операторларимиз қуйидагича жавоб беришмоқда: бу пандемияга қарши сиз ва биз биргаликда курашишимизга боғлиқ, агар барчамиз карантин қоидаларига қатьий риоя қилсак, жаҳон тажрибасига кўра, охирги касалланганлик ҳолати аниқлангандан кейин икки ҳафта ўтгач, карантин тугаши ҳақида эълон қилинади.

Мақсадимиз – фуқароларни уйда ўтирган ҳолатда ҳам керакли маълумотлар билан қуроллантириш, шундагина улар ваҳимага берилмай, касалликка қарши курашда бирдамликка эришишимизда кўмак берадилар», дейди ботни юритиш бўйича ишчи гуруҳ раҳбари, тиббиёт фанлари доктори, профессор Шуҳрат Боймурадов. 

Мавзу
Коронавирус Ўзбекистонда
15 март куни Ўзбекистонда коронавирусга чалинган илк бемор аниқланди.
Барчаси
Top