12:40 / 18.03.2021
43655
Тақдир ҳазили: Самарқандда суд биносини қурган қурилиш корхонаси ўша бинода суд қилинди

Тойлоқ туман суди биносини қурган «Хуршед барака сервис» МЧЖ ўзини суд қилган судьянинг креслосини олиб кетмоқчи...

«Хуршед барака сервис» МЧЖ раиси ўринбосари Муҳайё Сарибоева икки йил аввал Самарқанд вилояти Тойлоқ туманида суднинг янги биносини қуриб бергани ва бир йил ўтиб мазкур бинода қурилиш корхонасининг ўзини суд қилишгани ҳақида ҳикоя қилиб берди.

Маълум бўлишича, тендер савдолари ўтказиш бўйича вилоят комиссиясининг 2018 йил 19 сентябрдаги йиғилиш баёнига асосан «Хуршед барака сервис» МЧЖ 6 млрд 638 млн 468 минг сўмлик қурилиш ишларини 280 кун муддатда фойдаланишга топшириш шарти билан ғолиб бўлиб, Тойлоқ туманидаги жиноят ишлари бўйича туман, туманлараро иқтисодий ва фуқаролик судлари биносини қуриш ҳуқуқини қўлга киритган. Ўша йилнинг 25 сентябрида Самарқанд вилояти ҳокимлиги инжиниринг компанияси билан шартнома имзоланади.

2019 йил декабрида Давлат қабул ҳайъати қурилиши тугалланган бинони фойдаланишга қабул қилиш бўйича далолатномани расмийлаштиради. Пудратчи «Хуршед барака сервис» МЧЖ томонидан бажарилган ишлар тўғрисида 2019 йил 19 декабр куни 6 млрд 638,5 миллион сўмлик ҳисоб-фактура маълумотномаси ҳам расмийлаштирилади. Тегишли шахслар имзолагач, вилоят ҳокимлиги инжиниринг компанияси томонидан қабул қилиб олинади.

Демак, бундай олиб қаралганда, ҳаммаси жойида, бино қуриб берилган, эътирозлар бўлмаган ва тантанали тарзда суд ходимларига топширилган. Очилиш маросимида Олий суд раиси Козим Комилов, вилоят ҳокими Эркинжон Турдимов ҳам иштирок этган эди.

«Ҳақиқатда корхонамиз томонидан суд биносининг қурилиши учун 6 млрд 638 млн 468 минг сўмлик иш бажарилиши лозим эди. Аммо биз сметада кўрсатилган ишларни бажаришимиз давомида буюртмачи томонидан қўшимча жиҳозлар олиб келиб ўрнатиш талаб қилинди. Хусусан, Олий ва маҳаллий суд ходимлари билан ўтказилган сайёр йиғилишларда ҳамда оғзаки кўрсатмаларда лойиҳада кўрсатилган иш турини бошқасига алмаштириш, яъни лойиҳа-сметада кўрсатилган воситалар ўрнига қўшимча қурилиш ишлари олиб бориш, оргтехника ва мебел жиҳозларини кўпайтиришни сўрашди. Бажарилган иш, мебел ва жиҳозларни қайта ҳисоб-китоб қилиш орқали бизнинг қўшимча иш ҳақимиз тўлаб берилиши керак эди.

Бинони қуриб топширдик. Тошкентдан меҳмонлар келишди, ҳаммага намуна қилиб кўрсатилди. Аммо бино учун қўшимча олинган жиҳозларнинг тўлови тўланмади. Биз бошқа бир корхонадан қарийб 400 миллион сўмлик товар олиб, суд биносини жиҳозлагандик.

Суд биноси қурилиши учун олган қарзимизни ўз вақтида қайтара олмаганимиздан сўнг, ўша корхона даъвосига асосан ишимиз айнан ўзимиз қурган суд биносида кўрилди.

Қизиқ томони, бизни суд қилаётганларнинг ўзи масала моҳиятини англаб турган ҳолда бизнинг зараримизга қарор қабул қилди. Қарор адолатсиз демоқчи эмасман, аммо биздан бировнинг ҳақини ундириб бермоқчи бўлаётган суд тизими нега ўзимизнинг ҳақимизни бермайди?» — деди Муҳайё Сарибоева.

Энди савол туғилади: «Хуршед барака сервис» МЧЖ соҳада тажрибага эга бир қурилиш ташкилоти ҳисобланади. Шундай экан, нега «хомлик қилиб» суд биносини қуришда ортиқча маблағ ишлатди, жиҳоз ўрнатди?

Корхона масъулларининг айтишича, ўша вақтда «ура-ура» билан қайта смета-лойиҳа қилишнинг мавриди бўлмаган. Қолаверса, катта бир давлат ташкилоти шунчаки бир қурилиш корхонасини чув тушириши мумкинлигини хаёлларига келтиришмайди.

Қолаверса, «Хуршед барака сервис» МЧЖ масъулларининг қўлида 2020 йилнинг 24-25 декабр кунлари тузилган иккита далолатнома бор. Унга кўра, ҳақиқатан ҳам суд биноси қурилишида бажарилган ишнинг камчилиги аниқланмагани Самарқанд вилоят ДМНБ бош назоратчи-тафтишчиси, вилоят инжиниринг компанияси директори томонидан тасдиқланган. Аксинча, қўшимча ишлар бажарилгани, айтайлик, телевизор, кондиционер, турникет, компьютер, судьялар креслоси, стол-стул каби жиҳозлар ортиқча олиб келинган. Ушбу далолатнома ҳам вилоят «Тоза ҳудуд» унитар корхонаси ходими, вилоят инжиниринг компанияси назоратчиси томонидан имзоланган.

Демак, ҳақиқатан ҳам суд биноси қурилишида тадбиркорга ортиқча иш бажартирилгани — факт. Аммо табиийки, бу маблағни айни вақтда Тойлоқ туманидаги суд биносида ўтирган судьялар ойлигидан тўлаб бермайди. Буюртмачи — вилоят ҳокимлиги инжиниринг компанияси ва вилоят суд департаменти ҳам ҳозирча жим.

Хулоса ўрнида

«Хуршед барака сервис» МЧЖ эса мебел ва бошқа жиҳозларни суд биносига жойлаштирган. МИБ ундирувчи корхонанинг талабини бажариши керак. «Хуршед барака сервис» МЧЖ эса МИБга «Тойлоқдаги суд ходимлари фойдаланаётган курси ва кондиционер, умуман, кўпгина жиҳозлар бизники, ижро ҳаракатларини ўша бинодаги буюмларга қаратишингизни сўрайман» деб турибди.

«Хуршед барака сервис» МЧЖ вакиллари охирги чора сифатида Тойлоқдаги суд биносидан ўзлари киритган жиҳозларни олиб чиқишга мажбур бўлишларидан аввал хизмат ҳақи тўлаб берилишини кутиб туришибди. Ҳарқалай, давлатнинг жиддий бир органидан кресло ва телевизорни олиб чиқиб кетишса, уят бўлади!

Исомиддин ПЎЛАТОВ, Kun.uz мухбири.

Мавзу
Kun.uz суриштируви
Kun.uz халқ мурожаатлари асосида жойларда бўлиб, муаммоларни ўрганмоқда ва холисона ёритмоқда.
Барчаси
Top