Vazirlik Kun.uz'dagi Yaponiyaga ishga yuborish masalasidagi surishtiruvga munosabat bildirdi

Biroq, tinglovchilarning 196 nafari o‘qishni yakunlagan, ulardan 154 nafari test imtihonlariga jalb qilingan va 52 nafari malaka va til bilish sertifikatlarini olgan. Bu umumiy o‘qishga yo‘naltirilganlarning atigi 5 foizini tashkil etadi.

Ta’kidlash joiz, fuqarolarning tanloviga ko‘ra “Nippon Educational Academy”ga yo‘llanmalar berilishi bugungi kunda mehnat organlari tomonidan davom etmoqda va joriy yil oktyabr-dekabr oylarida 107 nafar ishsiz va band bo‘lmagan fuqaroga yo‘llanma berilgan.

Joriy yilning 21 iyul kuni Toshkent shahridagi “Ishga marhamat” monomarkazida tashkil etilgan va Vazirlik huzuridagi Tashqi mehnat migratsiyasi agentligi tomonidan to‘liq moliyalashtirilgan “Yaponiya-O‘zbekiston o‘rtasida mehnat munosabatlari va kasbiy ta’limni rivojlantirish istiqbollariga bag‘ishlangan 2-mehnat forumi”da JIC ko‘magida Yaponiyaning 18 ta rekruting tashkiloti ishtirok etdi va ular tomonidan O‘zbekiston mehnat bozori imkoniyatlarini Yaponiyada targ‘ib qilish bo‘yicha takliflar bildirildi. Forum doirasida 18 ta rekruting tashkilotiga OTIT (Yaponiyadagi texnik stajyorlarni tayyorlash tizimidagi vakolatli organ) tomonidan tasdiqlangan hamkorlik shartnomasi loyihalari ko‘rib chiqish uchun taqdim etilgan va ularning 6 tasi bilan hech qanday e’tirozlarsiz kelishuvlar imzolangan. Qolgan 12 tasi vazirlik rasmiylarining Yaponiyaga kutilayotgan tashrifi doirasida imzolanishi bildirilgan. Biroq, Yaponiyaga tashrif doirasida JIC tomonidan kelishuv shartnomalariga yangi qo‘shimchalar kiritilishi ta’kidlanib, bugungi kunga qadar ushbu shartnomalar bo‘yicha takliflar bildirilmagan.

Shuningdek, JIC bilan umumiy hamkorlik memorandumi imzolangan, ikki tomonlama uchrashuvda Yaponiya davlatida vaqtinchalik mehnat faoliyatini olib borayotgan fuqarolar huquq va manfaatlarini himoya qilish markazini 2022 yilning sentabr oyida tashkil etish bo‘yicha kelishuvga erishilgan. Biroq, hamkor tashkilot tomonidan kelishuvga asosan ushbu markazni Yaponiya tartibiga asosan davlat ro‘yxatidan o‘tkazish, shu jumladan markazni joylashtirish va ish faoliyatini yuritish bo‘yicha takliflar taqdim etilmadi”, — deyiladi vazirlik munosabatida.

Qo‘shimcha qilinishicha, Yaponiyadagi O‘zbekiston elchixonasining tavsiyasiga binoan “Nagoya-O‘zbekiston do‘stlik jamiyati” bilan hamkorlikda “O‘zbekistondan kelgan mehnat migrantlariga ko‘maklashish va ularning huquqlarini himoya qilish markazi” tashkil etilgan. Shundan kelib chiqqan holda joriy yil avgust oyida vazirlik ishchi guruhi Yaponiyada qator yirik ish beruvchi korxonalar bilan muzokaralar o‘tkazib, 20 ga yaqin shartnomalar imzolagan. Ushbu shartnomalar asosida yiliga o‘rtacha 5000 nafar fuqaroni yapon tili va Yaponiya mehnat bozorida talab yuqori bo‘lgan kasblarga o‘qitish tizimini tashkil qilish rejalashtirilgan. Shu bilan birga, JIGA tashkiloti bilan hamkorlikda vazirlik tizimidagi ta’lim muassasalariga Yapon mutaxassislarini ko‘ngilli sifatida jalb qilish choralari ko‘rilgan.

Vazirlik munosabatida raqobatni rivojlantirish, monopoliyaning oldini olish maqsadida yapon tilini o‘qitish uchun mavjud talablarga javob bera olgan har qanday tadbirkorlik sub’yektlari bilan hamkorlik qilish maqsadga muvofiqligi ham ta’kidlab o‘tilgan:

“Intervyuda e’tiroz bildirilgan “Yo‘l xarita”dagi “texnik kamchiliklarda” vazirlik tomonidan yapon tili bo‘yicha bilimni baholash yuzasidan tegishli hamkor tashkilotlar (Prometrik) bilan shartnoma imzolash, bitiruvchilarni yapon standartlari asosida test sinovlaridan o‘tkazish uchun “Prometrik” tashkilotiga kerakli shart-sharoitlarni yaratib berish (bu test sinovlarida Bandlik va mehnat munosabatlari vazirligi tizimi mutlaq ishtirok etmaydi) hamda til bilimini baholash bo‘yicha ixtisoslashgan markaz tizimini tashkil etish mexanizmlari belgilab berilgan”.