21:11 / 18.03.2023
19271

Qozog‘istonda o‘zbekistonlik ikki firibgar qo‘lga olindi

Astana politsiyasi davlatlararo qidiruvga berilgan shaxslarni ushladi. 

Foto: Getty Images

O‘zbekistonda 21 yoshli qizni qarindoshiga unashtirib, so‘ng qudalaridan pul undirgan firibgar Astanada qo‘lga olindi. Bu haqda Kazinform xabar berdi.

Qayd qilinishicha, Qozog‘iston poytaxti politsiyasi MDH davlatlari bilan hamkorlikda 15-16 mart kunlari keng ko‘lamli «Qidiruv» tadbirini o‘tkazgan. Tadbirning birinchi kunida Astana shahrida 8 nafar jinoyatchi aniqlanib, qo‘lga olingan. Yo‘qolgan 3 nafar fuqaroning joylashgan manzili aniqlangan.

Davlatlararo qidiruvga berilgan va ushlangan ikki xorijlikdan biri o‘zbekistonlik ayoldir.

«Xalqaro qidiruvda bo‘lgan 23 yoshli o‘zbekistonlik qizning shaxsi aniqlandi. U 21 yoshli qizni qarindoshiga unashtirgan, so‘ngra uyidan olib ketgan. Keyinroq u qudalaridan shantaj yo‘li bilan pul talab qilgan», deyiladi politsiya xabarida. 

Bundan tashqari, 42 yoshli O‘zbekiston fuqarosi firibgarlik qilib, poytaxtda yashab kelgan. Samarqand shahrida bir kishini ishga joylashtirishni va’da qilib, 1 million 400 ming so‘m pulini o‘zlashtirgan. 

Hozirda har ikki gumonlanuvchi vaqtinchalik hibsxonada saqlanmoqda. Ularni ekstraditsiya etish masalasi hal qilinmoqda.

Top