19:37 / 28.05.2024
17505

«Ayanchli xato bo‘ldi» – Netanyahu Rafahdagi noharbiy obektga zarba berilganini tan oldi

Isroil bosh vaziri Binyamin Netanyahu TsAXAL G‘azodagi Rafah shahrida noharbiy binoga zarba berganini tan oldi. Bu zarba oqibatida qochoqlar lagerida yong‘in chiqqan va kamida 45 kishi halok bo‘lgandi.

Foto: Yonatan Sindel / Flash90

Dushanba kuni Isroil parlamentida chiqish qilgan Netanyahu Rafahga raketa zarbasi berilayotganda «ayanchli xatoga yo‘l qo‘yilgani»ni tan oldi. U aynan qanday xato ekani haqida gapirmadi, lekin holat tekshirilayotganini aytdi.

«Tinch aholi vakillariga zarar yetkazmaslik bo‘yicha qilayotgan ishlarimizga qaramay, kecha tunda ayanchli xato sodir bo‘ldi. Holatni tekshiramiz va xulosa qilamiz. Bizning siyosatimiz shunaqa», dedi Netanyahu.

27 mayga o‘tar kechasi berilgan raketa zarbasi oqibatida qochoqlar yashayotgan chodirlar yonayotgani tasvirlangan kadrlar o‘sha vaqtdayoq tarqalgandi. Keyinroq TsAXAL zarba aniq razvedka ma’lumotiga asoslanib berilgani, bu HAMAS obekti ekani haqida bayonot berdi.

Isroil harbiylari bergan bayonotda zarba tinch aholiga zarar yetkazmagani, aksincha HAMASning ikki nafar yuqori martabali harbiysini o‘ldirgani aytilgandi. Ammo tinch aholi vakillari o‘lganini isbotlovchi kadrlar tarqalib, xalqaro hamjamiyat zarbani qoralay boshlagach, isroillik harbiylar ham tekshiruv boshlaganini aytib chiqishdi.

Seshanba kuni Isroilning Rafahga ajalvor zarbasidan keyin BMT xavfsizlik kengashi favqulodda yig‘ilish o‘tkazdi. Yopiq eshiklar ortidagi uchrashuvni xavfsizlik kengashining vaqtincha a’zosi Jazoir chaqirtirgan.

Mavzu
HAMAS–Isroil urushi
7 oktyabr kuni G‘azo bo‘lgasidagi HAMAS kuchlari Isroilga yoppasiga raketa zarbalari berdi va chegaradagi aholi punktlarini egallay boshladi. Bunga javoban Isroil tashkilotga qarshi urush ochdi. Bu safargi eskalatsiya avval kuzatilmagan darajada ko‘p qurbonlarga olib keldi.
Barchasi
Mavzuga oid
Top