18:38 / 03.06.2024
12967

Shavkat Mirziyoyev poyezd va samolyotlar uchun chipta topib bo‘lmasligini tanqid qildi

“Sayyohlar mahalliy reyslarga samolyot va poyezd uchun ikki oy uyoqda tursin, yarim yil oldin chipta olishda qiyinchiliklarga duch kelmoqda”, – dedi davlat rahbari. Prezident topshirig‘i bilan, qo‘shni davlatlar bilan chegaradan o‘tishni yana yengil qilish bo‘yicha muzokara o‘tkaziladi.

Foto: Kun.uz

Prezident Shavkat Mirziyoyev turizm sohasi bo‘yicha yig‘ilishda mahalliy yo‘nalishlarda qatnovchi poyezd va samolyotlarga chipta topish qiyinligini tanqid qili.

“Eng muhim masalalardan biri – sayyohlar mahalliy reyslarga samolyot va poyezd uchun ikki oy uyoqda tursin, yarim yil oldin chipta olishda qiyinchiliklarga duch kelmoqda.

Mutasaddilarga barcha qatnovlar haqida ma’lumot va chipta olish imkonini beradigan yagona onlayn platformani ishga tushirish topshirildi. Bunda chiptalarni tabaqalashgan narxda kamida 6 oy oldin savdoga chiqarish tizimi joriy qilinadi”, – deyiladi rasmiy xabarda.

Yig‘ilishda, shuningdek, mutasaddilarga qo‘shni davlatlardagi hamkasblari bilan chegaradan o‘tishni yana yengil qilish bo‘yicha muzokara o‘tkazish topshirildi.

O‘zbekistonda o‘tkaziladigan festivallar kalendar-rejasini takomillashtirish, chet ellik mashhur ijrochilar konsertini o‘tkazishga talablarni qayta ko‘rib chiqish zarurligi ko‘rsatib o‘tildi.

Top