Braziliyadagi attraksionda ayol 40 metr balandlikdan xavfsizlik arqonisiz otib yuborildi

Braziliyada 21 yoshli ayol xavfsizlik arqoni bog‘lanmagan holda balandlikdan sakrash oqibatida halok bo‘ldi, deb xabar berdi CBS News.

Baxtsiz hodisa 13 iyun kuni San-Paulu shtatida joylashgan «Skelet ko‘prigi» attraksionida yuz bergan. Internetda tarqalgan videoda ikki erkak ayolni baland ko‘tarib, jarlikka uloqtirganini ko‘rish mumkin. Atrofdagilar qizga xavfsizlik arqoni ulanmaganini payqab, «Yigitlar, arqon!» deb baqirgan. Ammo endi kech edi, ayol 40 metr balandlikdan pastga qulab halok bo‘ldi.

Hodisadan keyin uch nafar erkak qasddan odam o‘ldirish ayblovi bilan hibsga olingan. Rasmiylarning bildirishicha, tergov yakunida ularga qotillik ayblovi qo‘yilishi mumkin. Hozir hodisa tafsilotlarini aniqlash va javobgarlikni belgilash bo‘yicha tergov harakatlari davom etmoqda.

Mahalliy matbuot qurbon bo‘lgan ayol 21 yoshli Mariya Eduardu Rodriges de Freitash ekani haqida yozdi. U 14 iyun kuni San-Pauluda dafn etildi.

A 21-year-old woman died during a bridge jump in Limeira, Brazil, after workers allegedly failed to secure her safety rope before she was pushed from a 40-meter-high bridge. pic.twitter.com/EjZwOxqAPR

— Breaking911 (@Breaking911) June 14, 2026

Qayd qilinishicha, ushbu ko‘prikdagi attraksion Entre Cordas kompaniyasi tomonidan noqonuniy tashkil etilgan.

Rope jumping deb nomlanuvchi ushbu ekstremal sport turida kamroq cho‘ziluvchan arqondan foydalaniladi. Shuning uchun odam sakraganda yuqoridan pastga qarab emas, balki arg‘imchoq kabi oldinga va orqaga tebranadi.

Ushbu sport turining asoschisi hisoblangan amerikalik Den Usmon 1998 yilda 35 yoshida aynan rope jumping vaqtida halok bo‘lgan edi.