Ўзбекистон шахмат федерацияси ва «Central Chess Club» кўмаги билан рапид йўналишида ўтказилган баҳс 4 партия натижасига кўра, 3.5 – 0.5 ҳисобида Непомняший фойдасига ҳал бўлди.
Кечаги тадбир доирасида, шунингдек, Шри-Ланкада ўтган Осиё чемпионатида муваффақиятли қатнашиб қайтган ўзбекистонлик ёш шахматчиларни тақдирлаш маросими ҳам ташкил этилди. Мусобақада Ўзбекистон вакиллари 5 та олтин, 2 та кумуш ва 1 та бронза медали билан умумжамоа ҳисобида 2-ўринни эгаллашган эди.
Бугун, 17 апрель куни Ўзбекистон терма жамоаси халқаро гроссмейстер, жаҳон кубоги соҳиби Борис Гельфанд бошчилигидаги ўқув-йиғин машғулотларини якунлайди. 12 апрелдан буён давом этаётган тренинглар доирасида 15 апрель куни Ян Непомняший иштирокида мастер-класс ҳам ташкил қилинганди.
Маълумот учун, Ўзбекистонда илк марта бўлиб турган Ян Непомняший ҳозирда FIDE рейтингида 7-ўринни эгаллаб турибди. Россиялик ушбу гроссмейстер 2017 йил Лондонда ўтган супер турнирда фаолиятининг чўққисига чиққан: ўшанда амалдаги жаҳон чемпиони Магнус Карлсенни ҳам мағлуб этган Непомняший 8-турдан кейин пешқадам бўлиб тургани ҳолда охирги турда Фабиано Каруанага ютқазиб қўйиб, иккинчи ўринни олганди.
