«Оролни қайта тиклашнинг икки йўли бор. Биринчиси - Россия дарёлари ўзанини ўзимизга олиб келиш керак. Бунинг учун 25 йил вақт ва ҳар йили 600 млн доллар маблағ кетади. Бунинг иложи йўқ. Иккинчиси, ўрмонзорларни кўпайтириш ва чўл ўсимликларини экиш. Шу йўл билан Оролни қутқариб қола оламиз», деди Ўрмон хажалиги давлат қўмитаси раиси ўринбосари Абдушукур Ҳамзаев.
Тадбирда айтилишича, 2019 йил мобайнида Оролбўйи минтақасига 461 минг гектардан зиёд чўл ўсимликлари экилган. Бу давргача 30 йил давомида 400 минг гектардан камроқ ерларга ўсимликлар экиш ишлари амалга оширилганди. Бу кўрсаткични 2024 йилгача 2,6 млн гектарга чиқариш режалаштирилган.
