Қарор билан Пешкў ва Қоровулбозор туманлари ҳудудида 100 гектардан жами 200 гектар қишлоқ хўжалигида фойдаланилмаётган бўш турган ер участкаларини ажратиш ҳисобига қурилиш материаллари ишлаб чиқариш кластерлари ташкил қилиш ва уларни «Ғиждувон» эркин иқтисодий зонаси ҳудудига киритиш режалаштирилмоқда.
Шу мақсадда қарорда бир қатор тегишли вазирлик, қўмита ва ташкилотларга уч ой муддатда мазкур кластерларнинг ташқи транспорт, ишлаб чиқариш ва муҳандислик-коммуникация инфратузилмасини ривожлантириш дастурини ишлаб чиқиб, молиялаштириш манбаларига аниқлик киритиш вазифаси юклатилган.
Қурилиш материаллари ишлаб чиқариш кластерларининг бош режасини ишлаб чиқиш бўйича Бухоро вилояти ҳокимлиги ҳузуридаги «Ягона буюртмачи хизмати» ИК» ДУК буюртмачи этиб белгиланган.
Шунингдек, қарор билан вилоятда аукцион савдоларига чиқариладиган кон участкалари рўйхати, 2021-2023 йилларда қурилиш материаллари ишлаб чиқариш йўналишида амалга ошириладиган инвестиция лойиҳаларининг манзилли рўйхати тасдиқланмоқда. Қарор муҳокамаси бугун, 16 июль куни якунланади.
