Бош прокуратура ҳузуридаги департаментнинг хабар беришича, департаментнинг Сариосиё туман бўлими томонидан терговга қадар текширув ўтказилган. Текширувда, тумандаги “Баркамол авлод” болалар мактаби директорининг хўжалик ишлари бўйича ўринбосари ўқувчиларнинг ота-оналари тўлаган 207,7 миллион сўм бадал пулларини банк муассасасига топширмасдан, ўзлаштириш йўли билан талон-торож қилгани аниқланган. Текширув давомида етказилган зарарнинг 115 млн сўми ундирилиши таъминланган.
Шунингдек, департаментнинг Шўрчи туман бўлими томонидан туман электр тармоқлари корхонасининг мурожаатига асосан терговга қадар текширув ўтказилган. Текширувда, корхонанинг собиқ ҳуқуқшуноси И.Ж. (муқаддам фирибгарлик ва бошқа жиноятлари учун судланган) 28 нафар фуқаронинг электр энергиясидан қарздорлигини йўқ қилиб бериш эвазига 47 миллион сўм нақд пулини қўлга киритгани аниқланган. Текширув давомида И.Ж. ўз айбига иқрор бўлиб 2,2 миллион сўмни қайтаргани процессуал тартибда расмийлаштирилган.
Қайд этилишича, мазкур ҳолатлар юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) ва 168-моддаси (фирибгарлик) билан жиноят ишлари қўзғатилиб, тергов ҳаракатлари ўтказилмоқда.
