Намойишчилар шаҳар марказидаги Old Town Square ва Wenceslas Square майдонларида тўпланди. Ташкилотчилар баҳосига кўра, митингда 80 мингдан 90 минг нафаргача киши иштирок этган.
Фаоллар шу билан бирга президентни қўллаб-қувватлаш учун 1 миллион имзо тўплашини эълон қилди. Кейинчалик “барча хоҳловчилар сиғадиган жойда” янада кенг кўламли митинг ўтказиш режалаштирилмоқда. Кун ўрталарига келиб тахминан 600 мингга яқин имзо тўпланган.
Норозиликларга президент Петр Павел билан янги ўнг популистик ҳукумат раҳбари, миллиардер Андрей Бабиш ўртасидаги можаро сабаб бўлди. Можаро президентнинг Motorists for Themselves партияси фахрий раиси Филип Турекни атроф-муҳит вазири лавозимига тайинлашдан бош тортиши ортидан кучайган.
Павел ўз қарорини Турек илгари билдирган баъзи фикрлар демократик давлатда вазир лавозимига мос келмаслиги билан изоҳлади.
Шунингдек, президент ташқи ишлар вазири ва Турекнинг партиядоши Петр Мачинкани ушбу тайинлов масаласида унга босим ўтказиш ва амалда шантаж қилишга уринганликда омма олдида айблади.
Петр Павелни ҳозир мухолифатда бўлган партиялар вакиллари қўллаб-қувватламоқда.
