Тошкент вилоятининг Ўрта Чирчиқ тумани Ўрта овул маҳалласидаги хонадонлардан бирида ёнғин содир бўлди. Фавқулодда вазиятлар вазирлиги матбуот котиби ҳолатни Kun.uz’га тасдиқлади.
Маълум бўлишича, ёнғин 15 апрелдан 16 апрелга ўтар кечаси содир бўлган. 1996 йилда туғилган З.М. ва унинг 3 нафар фарзанди ҳодиса оқибатида вафот этган. Шунингдек, эркакнинг онаси ва турмуш ўртоғи шифохонага ётқизилган.
Қўшниларнинг Ishonch.uz сайтига айтишича, воқеа содир бўлган пайтда эркак яқинларини қутқаришга уринган. У аёли ва онасини деразадан ташқари чиқариб юборишга улгурган, аммо болаларини қутқаришга ҳаракат қилган пайтда ўзи ҳам ҳалок бўлган.
“Тунда қаттиқ овоз бўлди. Ҳамма уйдан чиқиб кетди. Қўрқиб кетдик”, деган қўшнилардан бири.
Ҳозирда ёнғиннинг келиб чиқиш сабаблари ўрганилмоқда.
