21 июл кунги президент селекторида стратегик корхоналар харажатлари ҳам алоҳида таҳлил қилинди.
Давлат раҳбарининг матбуот хизматига кўра, илгари тармоқлар умумий харажатларни фоизда қисқартириб, таннарх камайгани ҳақида ҳисобот берар эди. Бир бирлик маҳсулот таннархи бўйича таҳлил эса ҳақиқий ҳолатни кўрсатиб берган.
Масалан, Навоий кон-металлургия комбинатида 1 унсия олтин таннархи 8,2 фоизга ошган. Жами харажатлар ўтган йилга нисбатан 6,2 триллион сўмга ёки 22 фоизга кўпайган.
Ўзбекистон металлургия комбинатида пўлат шарлар ишлаб чиқариш таннархи 5,4 фоизга, “Ўзкимёсаноат”да карбамид бўйича 11,1 фоизга, аммиакли селитра бўйича 8,3 фоизга ошган.
Қайд этилишича, Ўзбекистон Миллий инвестиция жамғармасини бошқараётган АҚШнинг Franklin Templeton компанияси IPOга чиқиши керак бўлган 13 та йирик компанияни таҳлил қилиб берган.
Uzbekistan Airways мисолида маршрутлар оптимал танланмагани, рейслар ораси узоқлиги ва кечикишлар кўплиги, кейтеринг ҳамда техник хизматда рақобат йўқлиги сабабли 120 миллион доллар даромад бой берилаётгани кўрсатиб ўтилди.
Franklin Templeton таҳлилларига кўра, Uzbekistan Airways'нинг бозор қийматини 40 фоизга, “Ўзбектелеком”никини 50 фоизга ошириш имконияти бор.
