Гайана бош вазири Марк Филлипс мамлакат соҳиллари яқинида MV Barima паромининг ағдарилиши оқибатида ҳалок бўлганлар сони 53 нафарга етганини маълум қилди. Фожиа 18 июл куни кечқурун пойтахт Жоржтаундан Бирима-Уайни ҳудудидаги Порт-Кайтума аҳоли пунктига йўл олган паром тўлиқ тезликда ҳаракатланаётган вақтда содир бўлган.
Расмий маълумотларга кўра, қутқарув операцияси якшанба тонгида бошланган ва ҳозирга қадар 76 нафар йўловчи қутқариб қолинган. Дастлаб ҳалок бўлганлар сони 27 нафар деб маълум қилинган бўлса, кейинчалик бу рақам 41 нафарга, энди эса 53 нафарга етган.
Шунингдек, паромдаги йўловчилар сони бўйича ҳам аниқлик киритилди. Илк рўйхатларда кемада 133 нафар йўловчи борлиги айтилган эди. Бироқ 20 июл куни бош вазир Марк Филлипс воқеа вақтида паромда жами 179 нафар бўлганини билдирди. Шу боис ҳозирда яна 50 нафарнинг тақдири номаълум бўлиб қолмоқда ва қурбонлар сони яна ортиши мумкин.
Гайана шимоли-шарқий Жанубий Америкада жойлашган инглиз тилида сўзлашувчи давлат бўлиб, нефтга бой Эссекибо ҳудуди бўйича қўшни Венесуэла билан ҳудудий баҳс олиб бормоқда.
Фожиадан кейин тергов давомида паром капитани ва экипажнинг яна бир аъзосида марихуана истеъмол қилганлик аломатлари аниқланган. Тирик қолган капитаннинг наркотик моддага топширган тести мусбат чиққан.
VesselFinder маълумотларига кўра, MV Barima пароми 1939 йилда қурилган. Мамлакат президенти Муҳаммад Ирфаан Али фожиа сабабларини аниқлаш учун ҳар томонлама, холис ва мустақил тергов ўтказилишини маълум қилди.
Тирик қолган йўловчилардан бири News Source нашрига ҳодиса вақтида қаттиқ шовқин эшитгани, шундан сўнг кема ичига сув кириб кела бошлагани ва паром қисқа вақт ичида ёнбошлаб чўка бошлаганини айтган.
Қидирув-қутқарув ишлари давомида MV Barima денгиз тубидан, соҳилдан тахминан 15 километр узоқликда аниқланган. Қутқарувчилар бедарак йўловчиларни излаш ишларини давом эттирмоқда.
