Toshkentning muhtasham Forumlar saroyida Afg‘onistonda tinchlik o‘rnatishga bag‘ishlangan xalqaro konferensiya bo‘lib o‘tmoqda. Uning ochilish marosimida ma'ruza qilgan Afg‘oniston Prezidenti Muhammad Ashraf G‘ani nutqini o‘zbek tilida boshladi. U dastavval qo‘shni mamlakatda tinchlik o‘rnatish borasida tashabbus ko‘rsatgani uchun O‘zbekiston Prezidenti Shavkat Mirziyoyevga minnatdorlik izhor qildi.
“Muhtaram Shavkat Mirziyoyev! Biz buyuk o‘zbek xalqining mehmondo‘stligini qadrlaymiz. O‘zbekiston hukumati tomonidan Afg‘onistonda tinchlik o‘rnatishga qaratilgan xalqaro konferensiya tashkil etilgani munosabati bilan tashakkur bildiraman”, - dedi Ashraf G‘ani.
Shundan so‘ng, u nutqining asosiy qismiga o‘tishdan avval, Rossiyaning Kemerovo shahrida yuz bergan fojia munosabati bilan konferensiyada ishtirok etayotgan Rossiya delegatsiyasiga hamdardlik bildirdi hamda ushbu shaharda, shuningdek 21 mart kuni Afg‘oniston poytaxti Kobulda sodir etilgan terrorchilik qurbonlari xotirasiga bir daqiqalik sukut saqlashni taklif etdi.
