Avstraliyaning Qantas aviakompaniyasi samolyoti London – Sidney yo‘nalishi bo‘yicha parvoz qilib fuqaro aviatsiyasi tarixidagi eng uzoq davom etgan to‘xtovsiz uchishni amalga oshirdi. Bu haqda CNN telekanali xabar berdi.
Boeing 787-9 Dreamliner samolyoti sinov parvozi davomida havoda 19 soat 19 daqiqa bo‘ldi va bu vaqt ichida 17,8 ming kilometrni bosib o‘tdi. Shunday qilib, birdaniga ikkita jahon rekordi o‘rnatildi: parvoz masofa va vaqt bo‘yicha eng uzun tijorat reysi deb topildi.
Samolyot Londondagi Xitrou aeroportidan 14 noyabr kuni ertalab soat oltida havoga ko‘tarildi. U parvoz davomida Germaniya, Rossiya, Polsha, Belarus, Qozog‘iston va Xitoy ustidan uchib o‘tdi. So‘ngra janubga burildi va Filippin hamda Indoneziya uzra uchib o‘tdi.
Boeing 787-9 256 nafargacha yo‘lovchiga mo‘ljallangan bo‘lsa-da, uning bortida 50 kishi, jumladan, to‘rt nafar uchuvchi bo‘ldi. Qayd etilishicha, yo‘lovchilar parvoz davomida tong otishini ikki marta kuzatishgan.
