19:50 / 19.08.2021
37425
Qo‘qon shahri hokimining birinchi o‘rinbosari qo‘lga olingani aytilmoqda

Hokimlik mansabdori temir yo‘llar tizimidagi boshqa bir amaldor bilan til biriktirib, auksion g‘olibligini olib berish uchun 180 ming dollar so‘ragani aytilmoqda.

Qo‘qon shahar hokimligi

Qo‘qon shahar hokimining birinchi o‘rinbosari jinoyat ustida qo‘lga olingan. Bu haqda Xabar.uz sayti o‘zining huquqni muhofaza qilish organlaridagi manbasiga tayanib xabar tarqatdi.

Bosh prokuratura matbuot xizmati rahbari Hayot Shamsutdinov Kun.uz'ga bu haqda ma'lumotga ega emasligi va agar yangilik bo‘lsa, xabar qilishini bildirdi.

Qo‘qon shahar hokimligi matbuot xizmati Kun.uz'ga bu ma'lumotni na tasdiqladi, na inkor qildi. Hokimlik rasmiy vakili bu haqda bir necha daqiqa ichida bayonot berilishini bildirdi, ammo oradan 2 soat o‘tib ham rasmiy axborot berilganicha yo‘q.

Xabar.uz manbasiga ko‘ra, hokimning 1-o‘rinbosari A.N. va Qo‘qon mintaqaviy temir yo‘l uzeli moliya bo‘limi boshlig‘i o‘rinbosari O.M. o‘zaro jinoiy til biriktirib, tadbirkorga mazkur temir yo‘l uzeli balansida bo‘lgan 2,5 gektar yer maydonidagi bino va inshootlar bo‘yicha o‘tkaziladigan auksion savdolarda uning foydasiga qaror chiqartirib berish evaziga 180 000 dollar talab qilgani gumon qilinmoqda.

Gumondorlar talab qilingan puldan 10 ming dollarini olayotgan paytda tegishli organlarning tezkor xodimlari tomonidan qo‘lga olingan.

Qo‘shimcha qilinishicha, ayni paytda ularga nisbatan firibgarlik va pora berishga qasd qilish alomatlari bilan jinoyat ishi qo‘zg‘atilib, qamoqqa olingan hamda dastlabki tergov harakatlari o‘tkazilmoqda.

Top