Internetda Ahmadboyning noqonuniy faoliyati haqidagi ko‘rsatuv videosi paydo bo‘ldi

16 iyun kuni O‘zMTRKning «Toshkent», «O‘zbekiston», «Yoshlar» va boshqa telekanallar orqali O‘zbekistonda moliyaviy piramida tashkil etgani uchun huquq-tartibot idoralari tomonidan qo‘lga olingan Ahmadjon Tursunboyev haqidagi ko‘rsatuvlar namoyish qilindi. Internetda «Toshkent» telekanali orqali efirga uzatilgan ko‘rsatuv videoyozuvi paydo bo‘ldi.

Toshkent viloyatining Chinoz tumanidagi «Chinoz halol chorva» va «Chinoz Avto Xamkor» korxonalari ta'sischisi hisoblangan Ahmadjon Tursunboyev 4-5 yildan buyon ikki barobar qilib qaytarish va'dasi bilan aholidan juda katta miqdordagi omonat mablag‘larni milliy va xorijiy valyutada qabul qilish bilan noqonuniy ravishda shug‘ullanib kelgani uchun qo‘lga olindi.

Tursunboyev va uning yaqin qarindoshlari uylarida, shuningdek, unga tegishli kompaniyalarda o‘tkazilgan tezkor tadbirlar natijasida daliliy ashyo sifatida 13,139 mlrd so‘m va 7,9 mln AQSh dollari olib qo‘yildi. Ayni paytda tergov ishlari olib borilmoqda.