Тошкентда II Халқаро киберхавфсизлик саммити бўлиб ўтади

Тошкентда 9-10 октябр кунлари «Киберхавфсизлик саммити – Марказий Евроосиё, CSS 2024» II Халқаро киберхавфсизлик саммити бўлиб ўтади. Унда 30 дан ортиқ мамлакатдан 60 га яқин компания, 120 дан ортиқ делегатлар иштирок этиши кутилмоқда.

Қайд этилишича, саммитда Жанубий Корея, Озарбайжон, Туркия, Грузия, Туркманистон, Тожикистон, Қозоғистон каби 10 дан ортиқ хорижий давлатларнинг киберхавфсизлик масалаларида ваколатли органлари ва халқаро ташкилотлар — Халқаро электралоқа иттифоқи, FIRST, OIC-CERT ҳамда SABABA, Check Point, Cloudflare, Fortinet, Group-IB, Trend Micro каби компаниялар иштирок этмоқда. Бундан ташқари, кибермаконда малакали мутахассис, ҳакер Жейсон Стрет ҳам ўз тақдимоти билан қатнашади.

«Саммитнинг юқори даражали қарор қабул қилувчилар, киберхавфсизлик бўйича экспертлари аудиторияси динамик глобал хавфхатар манзарасини ва минтақа мамлакатларига рақамлаштириш орқали тақдим этилаётган ижтимоий-иқтисодий имтиёзлардан тўлиқ фойдаланишда қандай ёрдам бериши мумкинлигини ўрганади», — дейилади хабарда.

Таъкидланишича, саммитнинг умумий мавзуси рақамли дунёда киберхавфсизликнинг аҳамияти: ечимлар, таҳдидлар ва ҳамкорлик, муҳим инфратузилма ва бизнес активларини ҳимоя қилишга қаратилган. Бу йилги саммитда 60 га яқин маърузачилар ўз компаниялари ва таклифларини тақдим этади.

Шу билан бирга, икки кунлик саммит доирасида «Cyberkent 2.0», CTF (очиқ топшириқлар), «Robbo-Fest» ёш авлод учун ташкил қилинган робототехника мусобақалари, шунингдек, «Cyberkent 2.0» республика мусобақаси доирасида «Workshop» семинар-тренинги бўлиб ўтиши режалаштирилган.