Буюк Британия шаҳзодаси шаҳзода Ҳарри ва унинг рафиқаси Меган Маркл қироллик хонадонининг юқори мартабали аъзолари мақоми ва у билан боғлиқ имтиёзлардан воз кечишини эълон қилиши Британия жамоатчилигида кенг муҳокама қилинмоқда.
Маҳаллий нашрларнинг ёзишича, қиролича Елизавета II уларнинг огоҳлантирмасдан бундай қарорга келганидан «қайғуга тушган ва ранжиган». The Daily Mail эса қиролича ҳатто «ғазаблангани» ҳақида ёзмоқда.
Қиролича матбуот хизмати ҳозирча 8 январь оқшомида берилган қисқача баёнот билан чекланди. «Биз уларнинг бошқа ёндашув истагини тушунамиз, аммо бу вақт талаб қиладиган мураккаб масаладир», — дейилади Елизавета II номидан айтилган баёнотда.