USAID’нинг Вашингтондаги штаб-квартираси ёпилди

АҚШ Халқаро тараққиёт агентлигининг (USAID) Вашингтондаги штаб-квартираси ёпилди. Муассаса ходимлари электрон почта орқали ишга чиқмаслик ҳақида хабардор қилинди, деб ёзади CNN.

«Агентлик раҳбариятининг кўрсатмасига биноан USAID’нинг Роналд Рейган биносидаги штаб-квартираси 3 февралдан ходимлар учун ёпилади. Одатда USAID’нинг штаб-квартирасида фаолият юритадиган агентлик ходимлари эртага масофадан туриб ишлайди. Хизмат кўрсатиш бўйича алоҳида функцияни бажарадиган ходимлар билан раҳбарият алоҳида боғланади», — дейилади электрон мактубда.

Телеканалнинг маълум қилишича, бино деворларидан USAID логотипи ва унинг фаолиятига оид суратлар ечиб қўйилган.

Шунингдек, АҚШ давлат котиби Марко Рубио 3 январ куни USAID директори вазифасини бажараётганини эълон қилди.

Трамп маъмурияти бутун дунё бўйлаб нодавлат ва нотижорат ташкилотларга миллиардлаб долларларни ажратиш билан шуғулланиб келган агентликни АҚШ Давлат департаменти бўйсунувига ўтказмоқчи эканлиги ҳақида хабарлар тарқалганди. Рубио ушбу янгиликни тасдиқлаб, USAID «Давлат департаментининг сиёсий директиваларига мувофиқ иш кўриши кераклигини, аммо агентлик буни бажаришда бош тортаётганини» билдирган.

«Мақсадимиз кўрсатаётган ташқи ёрдамларимизни миллий манфаатларимизга мослаштириб олиш. Агар сиз бутун дунёдаги миссиялар ва элчихоналарни кўздан кечирсангиз, аксарият ҳолларда USAID биз миллий старатегиямиз доирасида қилишни истаётган вазифаларга зид дастурларда иштирок этаётганини кўришингиз мумкин. Бундай давом этиши мумкин эмас», — дейди Рубио.

Аввалроқ АҚШ президенти янги ҳукумат самарадорлиги департаменти раҳбарларидан бири этиб тайинлаган бизнесмен Илон Маск USAID’ни танқид қилган эди. Tesla ва SpaceX бош директори агентликни жиноий ташкилот деб атаган ва USAID’ни биологик қуролларни ишлаб чиқишни молиялашда айблаган. Шунингдек, АҚШ президенти Доналд Трамп АҚШ Халқаро тараққиёт агентлиги раҳбарияти истеъфога чиқишини маълум қилган эди.