Путин ва Си Хитойда Украинадаги урушнинг келажагини муҳокама қилади

Россия президенти Владимир Путиннинг Хитойга ташрифидаги асосий лаҳза Вашингтоннинг ҳарбий ҳаракатларни тўхтатиш бўйича саъй-ҳаракатлари фонида Москва ва Пекиннинг Украинадаги уруш бўйича позицияларини мувофиқлаштириш бўлади. Бу ҳақда The Guardian ёзди.

Нашр журналистларининг эслатишича, шу ҳафта охирида Путиннинг энг муҳим иттифоқдошига ташрифи бошланади, Кремлнинг таъкидлашича, бу Украина бўйича музокараларнинг ҳал қилувчи палласида бўлиб ўтади.

Қайд этилишича, Путин қарийб бир ҳафталик сафари давомида Шанхай ҳамкорлик ташкилоти саммитига ташриф буюради, хитойлик ҳамкасби билан музокаралар ўтказади ва Пекинда Япониянинг Иккинчи жаҳон урушидаги мағлубиятининг 80 йиллигига бағишланган ҳарбий парадда қатнашади. Сўнгги тадбирда Путин КХДР раҳбари Ким Чен Ин, Эрон ва Куба етакчилари ёнида асосий меҳмон бўлиши керак.

Таҳлилчиларга кўра, Путин ва Си музокараларидаги асосий масала Украинадаги уруш бўйича позицияларни мувофиқлаштириш бўлади.

Таъкидланишича, Путин Хитойдан кейинги ёрдамни кута оладими ва агар АҚШ Россиядан жанговар ҳаракатларни тўхтатиш учун босим ўтказишни сўраса, Пекин бунга қандай муносабатда бўлишини билмоқчи.

Украинадаги уруш пайтида Хитой Россия учун иқтисодий қутқарувчига айланди, шунинг учун Си ва Путин иқтисодий ҳамкорлик масалаларини ҳам ҳал қилишга ҳаракат этади, деб ёзди нашр.

Россия Хитой узоқ муддатли истиқболда ундан кўпроқ нефт ва газ сотиб олиш-олмаслигини билмоқчи. Хусусан, томонлар узоқ вақтдан бери таклиф қилинган «Сила Сибири-2» газ қувури ва Хитой билан мавжуд нефт алоқасини кенгайтириш режаларини муҳокама қилиши кутилмоқда.

Журналистларнинг тахмин қилишича, музокаралар Пекин ва Москва ўртасидаги ҳарбий ҳамкорликни чуқурлаштиришга ҳам тааллуқли бўлади. Хитой Россияга тўғридан-тўғри ҳарбий ёрдам кўрсатишдан бош тортган бўлса-да, Америка расмийлари Пекин унга ҳарбий машинани тиклаш учун зарур бўлган дастгоҳларнинг тахминан 70 фоизини ва яримўтказгичларнинг 90 фоизини етказиб берганини даъво қилмоқда. Бунинг эвазига Хитой сезгир мудофаа технологиялари бўйича ёрдам олмоқда, деб ишонилади.

Шунингдек, ташриф давомида рамзий маънода камчилик бўлмайди, дейилади мақолада. 3 сентябр куни Пекинда бўлиб ўтадиган ҳарбий парадда Путин Си билан ёнма-ён ўтириши кутилмоқда - бу 9 май куни Москвада ғалаба кунини нишонлашнинг кўзгудаги акси бўлади, ўшанда Хитой етакчиси фахрий ўринни эгаллаган, Хитой қўшинлари россиялик ҳамкасблари билан бирга Қизил майдондан ўтган эди.