Путин Херсон ва Запорижжядан воз кечишга тайёр эмас

Оқ уйда Зеленскийни Аляскага таклиф қилиш масаласи муҳокама қилинмоқда. Манбаларга кўра, унинг «баъзи учрашувлар»да иштирок этиши истисно қилинмаган

Оқ уй Доналд Трамп ва Владимир Путиннинг 15 август куни Аляскада бўлиб ўтадиган учрашувига тайёргарликни давом эттирмоқда. Володимир Зеленский у ерга таклиф қилинадими ёки йўқми, ҳозирча номаълум. Оқ уй Зеленскийни Аляскага таклиф қилиш имкониятини «кўриб чиқаётгани» ҳақида NBC News тўртта манбага таяниб хабар берди. Трамп маъмуриятининг юқори мартабали вакилига кўра, «барча бу содир бўлишига қаттиқ умид қилмоқда».

Reuters маъмурият вакилига таяниб ёзишича, Трамп «уч томонлама саммит учун очиқ», бироқ ҳозирча Оқ уй Путиннинг илтимосига кўра икки томонлама учрашув ўтказишни режалаштирмоқда. Оқ уйнинг юқори мартабали вакили NBC News’нинг Зеленский Аляскага расмий таклиф олган-олмагани ҳақидаги саволига шундай формулировкада жавоб қайтарган.

Бироқ CNN’нинг икки манбасига кўра, Оқ уй «Зеленскийнинг баъзи учрашувларда иштирок этиши мумкинлигини истисно қилмаяпти». Оқ уй вакилларидан бирининг сўзларига кўра, Зеленский иштирокидаги ҳар қандай тадбир «катта эҳтимол билан Трамп ва Путин учрашувидан кейин бўлиб ўтади». NBC News манбаси таъкидлашича, агар Зеленский Аляскага борадиган бўлса, у ерда Путин билан шахсий учрашуви ўтказилиши ва «улар бир хонада бўлиши» аниқ эмас.

Европа етакчилари Украинани қўллаб-қувватлади ва урушни тугатиш режасини тақдим этди: биринчи навбатда – ўт очиш тўхтатилиши керак

9 август куни Лондон яқинидаги Чивнинг Ҳаус расмий қароргоҳида Европа, Украина ва АҚШ вакиллари иштирокида йиғилишлар бўлиб ўтди, унда Доналд Трамп ва Владимир Путиннинг Аляскадаги учрашуви олдидан томонларнинг умумий позицияси муҳокама қилинди. Украина томонидан президент офиси раҳбари Андрей Ермак ва июл ойида Миллий хавфсизлик ва мудофаа кенгаши котиби этиб тайинланган собиқ мудофаа вазири Рустем Умеров бор эди. АҚШ номидан вице-президент Жей Ди Вэнс иштирок этди.

Йиғилишлар якунида Буюк Британия, Франция, Германия, Италия, Полша ва Финландия етакчилари Еврокомиссия раҳбари Урсула фон дер Ляйен билан биргаликда баёнот берди, унда «мазмунли музокаралар фақат ўт очишни тўхтатиш ёки ҳарбий ҳаракатлар интенсивлигини пасайтириш шароитида ўтказилиши мумкинлиги» айтилган. Европа етакчилари музокараларнинг бошланғич нуқтаси ҳозирги тўқнашув чизиғи бўлиши кераклигини таъкидлашмоқда ва «Украинада тинчлик йўлини Украинасиз аниқлаб бўлмаслиги»ни айтишмоқда.

The Wall Street Journal газетаси маълумотларига кўра, ушбу учрашувлар якуни Европа етакчиларининг ёрдамчилари Америка томонига тақдим этган урушни тугатиш бўйича қўшма режа бўлди. 9 август куни тушдан кейин Финландия президенти Александр Стубб ҳам Трампга қўнғироқ қилиб, унга Европа ташаббусини тақдим этди, деб ёзади WSJ. Газета манбаларига кўра, Чивнинг Ҳаусдаги учрашувлар «урушни тўхтатиш йўлида олға силжишга ёрдам берган», Америка томони эса Европа режасига «ижобий муносабатда бўлган». «Сезиларли тараққиёт» ҳақида Axios ҳам манбага таяниб ёзмоқда.

Володимир Зеленский Украина «Европа етакчиларининг қўшма баёнотини қадрлаши ва тўлиқ қўллаб-қувватлаши»ни билдирди. Бир кун аввал у ўзининг кечки мурожаатида Путин Херсон ва Запорижжя областларининг бир қисмини, шунингдек, Донбасс ва Қримни эгаллаб олгани «кечирилиши»ни исташини, бироқ Украина ўз ҳудудини яна «бўлиб олишга уриниш»га йўл қўймаслигини алоҳида таъкидлаганди. «Қотилликларда пауза эмас, реал, давомли тинчлик керак. Қачондир, бир неча ойдан кейин эмас, дарҳол ўт очишни тўхтатиш керак», – дея қўшимча қилди Зеленский.

Россия ТИВ Европа етакчилари баёнотини «навбатдаги нацистча варақа» деб атади. «Банкова (Киевдаги Банкова кўчасида Украина президенти қароргоҳи жойлашган) ва Брюссел бюрократияси ўртасидаги муносабатлар аллақачон некрофилияга ўхшайди ва у томонларнинг қизғин ўзаро муносабати билан ажралиб туради», – деди Ташқи сиёсат идорасининг расмий вакили Мария Захарова.

Кремл Херсон ва Запорижжя областларининг босиб олинган қисмларидан воз кечишга тайёр эмас. АҚШ ва Европадагилар Путинни аввалига нотўғри тушунган

Владимир Путин Херсон ва Запорижжя областларида Россия томонидан босиб олинган ҳудудларни Украинага қайтаришга тайёр эмас, деб ёзади The Washington Post Доналд Трампнинг махсус вакили Стив Уиткоффнинг Россия президенти билан учрашуви мазмунидан хабардор манбага таяниб.

6 август куни Уиткофф билан бўлиб ўтган учрашувда Путин Киевдан Донбассдан воз кечишни талаб қилиб, бунинг эвазига ўт очишни тўхтатиш ва фронт чизиғини ҳозирда эгаллаб турилган позицияларда музлатишга рози бўлганди.

Шундан сўнг, Доналд Трамп Володимир Зеленский ва Европанинг қатор етакчилари билан телефон орқали мулоқот қилди. Ушбу мулоқотнинг ҳеч бўлмаганда айрим иштирокчилари «Путин Херсон ва Запорижжя областларига даъволаридан воз кечишга рози бўлди», деган таассуротда эди, деб ёзади Axios.

The Washington Post суҳбатдоши ҳам Америка томони дастлаб Путиннинг Запорижжя ва Херсон областларидаги ҳарбий ҳаракатларни тўхтатиш таклифини у ердан Россия қўшинларини олиб чиқишга тайёрлик сифатида қабул қилган. Аммо газета манбасига кўра, Кремл босиб олинган ҳудудлардан воз кечишга тайёр эмас. Путин ҳали ҳам Донецк, Луҳанск, Запорижжя ва Херсон областларини тўлиқ назорат қилишни хоҳлаётгани ҳақида бир кун олдин Bild газетаси ҳам манбаларга таяниб хабар берганди.

Axios маълумотига кўра, кейинроқ Уиткофф Украина ва Европа расмийлари билан суҳбатда Путин фақат Россиянинг Запорижжя ва Херсон областларидаги ҳозирги позицияларини музлатишга рози бўлганини айтган.